સુરતના પાંડેસરા વિસ્તારમાં આર્થિક સંકડામણને લઈને લુમ્સના કારખાનેદારે આપઘાત કરી લીધો હોવાનો બનાવ સામે આવ્યો છે. મૂળ મહેસાણાના વતની સુરત શહેરના અલથાણ ભીમરાડ કેનાલ રોડ ખાતે આવેલ આકાશ એસ્ક્લેવમાં રહેતા સીતારામ કાંતિભાઈ પટેલ પરિવાર સાથે રહેતા હતા. પાંડેસરા વડોદ ગામ ખાતે આવેલ મિનરવા ઇન્સ્ટ્રીયલ એસ્ટેટમાં લૂમ્સનું કારખાનું ધરાવતા હતા. આ દરમિયાન ગઈકાલે સાંજે 43 વર્ષીય સીતારામ ખાતાના ત્રીજા માળે આવેલ ઓફિસની અંદર પંખાના હુક સાથે દોરી બાંધી ગળાફાસો ખાઈ આપઘાત કરી લીધો હતો.

આ ઘટનાને પગલે કારીગરો સહીત ત્યાં હાજર લોકો ચોકી ઉઠ્યાં હતા. આ ઘટનાની જાણ થતા પાંડેસરા પોલીસ સ્થળ ઉપર પહોંચી હતી અને મૃતદેહને પીએમ અર્થ મોકલી કાર્યવાહી હાથ ધરી હતી. જયારે આઘાતના સમાચાર મળતા પરિવારમાં શોકનો માહોલ છવાઈ ગયો હતો. મૃતકના ભાઈ જયેશ પટેલે જણાવ્યું હતું કે, છેલ્લા ઘણા સમયથી લુમ્સ ખાતામાં કાપડનો ઓર્ડર નહીં મળવાથી ભાઈ ટેન્શનમાં રહેતો હતો. ધંધામાં મંદી હોવાના કારણે આર્થિક સંકડામણથી જ પોતાના જ લુમ્સ ખાતામાં ગળાફાંસો ખાઈ આપઘાત કરી લીધો છે. મને પણ આ બાબતે કોઈ જાણ કરી ન હતી. ધંધામાં મંદીના કારણે માનસિક ટેન્શનમાં આવી સીતારામભાઈએ આ પગલું ભરી લેતા પરિવાર શોકમાં ગરકાવ થઈ ગયો છે. સીતરામભાઈને બે સંતાન છે. જેથી કારખાનેદારના આપઘાતના પગલે બે સંતાનોએ પિતાની છત્રછાયા ગુમાવી છે.

સુરતના સચિન વિસ્તારમાં એક વિચિત્ર ઘટના સામે આવી છે. ઘટના જોઈને લાગે છે કે પાડોશી પાડોશીનો દુશ્મન બની ગયો છે. ઘટના એવી છે કે સચિન સ્લમ બોર્ડમાં રહેતા એક પરિવારે પોતાના ઘરમાં એક પાલતુ કૂતરો રાખ્યો હતો, ત્યારે અચાનક કૂતરો ભસવા લાગ્યો, જ્યારે માલિક ઘરની બહાર આવ્યો અને જોયું કે તેની કારમાં આગ લાગી હતી, ત્યારે માલિક અને તેની પત્નીએ ઘરની બહાર ભસ્યો હતો. આગ બુઝાવવાનો પ્રયાસ કરવામાં આવ્યો હતો પરંતુ આગને કારણે કારને ભારે નુકસાન થયું હતું.

કારના માલિક દ્વારા વીમો ઉતરાવવામાં આવ્યો હતો. બે-ત્રણ દિવસ પછી વીમા કંપનીના કર્મચારીઓ સ્થળ પર નિરીક્ષણ માટે આવ્યા હતા. નિરીક્ષણ દરમિયાન તેમની નજર સામે ARO પ્લાન્ટમાં લાગેલા CCTV પર ગઈ. કર્મચારીઓ દ્વારા સીસીટીવી કેમેરાના ફોટા ચેક કરવામાં આવ્યા હતા, જેમાં કર્મચારીને ખબર પડી હતી કે 15મીએ રાત્રે એક યુવક કાર પર પેટ્રોલ છાંટીને આગ લગાવી રહ્યો છે.આ ફૂટેજ કારના માલિક અને તેની પત્નીને બતાવતાં તેમણે આગ લગાડનારને ઓળખી બતાવ્યો હતો. આગ લગાડનાર ખૂદ પડોશી યુવક જ હતો. સચિન સ્લમ બોર્ડમાં રહેતા અને મીલમાં નોકરી કરતા રામજી કનૈયાલાલ યાદવે આ અંગે સચિન પોલીસમાં ફરિયાદ આપતાં પોલીસે પડોશી સુબોધ ધર્મેન્દ્ર રમાણી(25)(રહે,સ્લમ બોર્ડ, સચીન)ની સામે ગુનો નોંધી તેની ધરપકડ કરી છે. સુબોધ રમાણી અગાઉ ચોરીમાં 5 વખત પકડાયો હતો.

જોકે તેણે પડોશીની ડસ્ટર કારને આગ કેમ લગાડી તે અંગે પોલીસને કોઈ સંતોષકારક જવાબ આપતો નથી. રામજી યાદવ ધંધા અર્થ બહારગામ ગયેલો હોવાથી જે તે વખતે ફરિયાદ કરી ન હતી.

સુરત ગ્રામ્ય એસઓજી પોલીસને મોટી સફળતા મળી છે. સુરત ગ્રામ્ય SOGમાં ફરજ બજાવતા જગદીશ ભાઈ તેમજ રોહિત ભાઈને બાતમી મળી હતી કે, નવી પારડી ગામની સીમમાં આવેલા થારોલી ફળીયામાં રહેતા ભાવેશ મકવાણા નામના ઇસમે તેના ઘરની પાછળના ભાગે આવેલા વાડામાં આવેલા બગીચામાં લોખંડની પેટીમાં ગાંજાનો જથ્થો રાખેલો છે. માહિતીના આધારે પોલીસે અહીં દરોડો પાડી તપાસ કરતા 24 લાખ 47 હજાર 400 રૂપિયાની કિમતનો 244.740 કિલોગ્રામ ગાંજાનો જથ્થો મળી આવ્યો હતો. જેથી પોલીસે આ ઘટનામાં ભાવેશ ભૂપતભાઈ મકવાણાની ધરપકડ કરી હતી. તેમજ બે મોબાઈલ અને ગાંજાનો જથ્થો મળી કુલ 24.52 લાખનો મુદામાલ જપ્ત કર્યો હતો.

ઝડપાયેલો ઇસમ ભાવેશ છૂટકમાં ગાંજાના જથ્થાનું વેચાણ કરતો હતો. જેથી તે સુરતના કાલુ નામના ઇસમ પાસેથી પણ ગાંજાનો જથ્થો ખરીદતો હતો અને આરોપી ભાવેશ અને કાલુ તથા કાલુના માણસે મળી મોટા પ્રમાણમાં ગાંજાનો જથ્થો મંગાવી આરોપી ભાવેશે તેના ઘરની પાછળના ભાગે આવેલા વાડામાં ગાય ભેસના ગમાણની પાછળ બનાવેલા બગીચામાં લોખંડની પેટીમાં ગાંજાનો જથ્થો સંગ્રહ કર્યો હતો. જેમાંથી તેઓ બંને છૂટક તથા જથ્થાબંધ વેચાણ કરતા હતા. વધુમાં પોલીસે આ ઘટનામાં કાલુ તથા તેના માણસને વોન્ટેડ જાહેર કરી વધુ તપાસ હાથ ધરી છે.

સુરત મહાનગરપાલિકા સંચાલિત નગર પ્રાથમિક શિક્ષણ સમિતિની સામાન્ય સભામાં શિક્ષકોની ઘટ મુદ્દે થોડો હોબાળો થયો હતો પરંતુ સભા પૂરી થયા બાદ શાસકો અને વિપક્ષના કાર્યકરો સામસામે આવી જતાં હોબાળો મચી ગયો હતો શાસક વિપક્ષ સભ્ય આક્રમક બની સામસામે આવી જતા પોલીસે દરમિયાનગીરી કરવી પડી હતી. સભા પૂરી થયા બાદ લોબીમાં ભાજપ ચોર છે, અને ભાજપમાં આવી જાવ ભાજપમાં આવી જાવ ના નારા સાંભળવા મળ્યા. સુરત નગર પ્રાથમિક શિક્ષણ સમિતિની આજે માસિક સામાન્ય સભા મળી હતી. સામાન્ય સભામાં વિપક્ષ એક જ સભ્ય હોવાથી તેઓનો વિરોધ ધીમો પડી ગયો હતો. પરંતુ સભા પૂરી થયા બાદ આપ ના બે કોર્પોરેટરો અને કેટલાક કાર્યકરોએ સભાખંડમાં પ્રવેશવાનો પ્રયાસ કર્યો હતો. જોકે, સભાખંડમાં પ્રવેશવા દેવામાં ન આવતા લોબીમાં આપ ના કાર્યકરોએ હોબાળો મચાવ્યો હતો. શિક્ષણ સમિતિમાં શિક્ષકોની ઘટ પૂરી કરે તેવી માગણી કરી હતી.

જેની સામે શિક્ષણ સમિતિના સભ્યો પણ આક્રમક બન્યા હતા તેઓએ કહ્યું હતું કે, ઘટ છે તે પુરી કરી દેવામા આવશે. ત્યારબાદ બન્ને કાર્યકરો અને શિક્ષણ સમિતિના શાસક પક્ષના સભ્યો સામસામે આવી ગયા હતા. બન્ને તરફથી નારા બાજી શરુ થતાં વાતાવરણ ગરમાયું હતું. લોબીમાં ભાજપ ચોર છે, અને આપ ચોર છે, ભાજપમાં આવી જાવ ભાજપમાં આવી જાવ ના નારા સાંભળવા મળ્યા હતા. જેના કારણે વાતાવરણ તંગ બની ગયું હતું. વાતાવરણ તંગ બનતા પોલીસની એન્ટ્રી થઈ હતી અને પોલીસે બંને પક્ષ વચ્ચે ઉભા રહીને તેમને છૂટા પડ્યા હતા.

નગર પ્રાથમિક શિક્ષણ સમિતિની કુલ શાળાઓમાં સરેરાશ પાંચ શિક્ષકોની ઘટ હોય તેવો મુદ્દો આમ આદમી પાર્ટી દ્વારા ઉઠાવવામાં આવ્યો હતો. સરેરાશ શિક્ષકોની ઘાતને જોતા 1291 કરતા વધુ શિક્ષકોની ઘટ છે. જેની સામે માત્ર પ્રવાસી કેટલાક શિક્ષકોની મદદથી શિક્ષણકાર્ય ચલાવવામાં આવી રહ્યું છે. શાળામાં પૂરતા પ્રમાણમાં શિક્ષકો જ નહીં મળે તો, વિદ્યાર્થીઓને જ્ઞાન ક્યાંથી આપવામાં આવશે? આ મુદ્દે જબરજસ્ત સૂત્રોચ્ચાર કરીને હોબાળો મચાવવામાં આવ્યો હતો. નગર પ્રાથમિક શિક્ષણ સમિતિના પ્રમુખ ધનેશ શાહે જણાવ્યું કે, રાજ્ય સરકાર દ્વારા અને કોર્પોરેશન દ્વારા શિક્ષકોની ભરતી માટેના તમામ પ્રયાસો કરવામાં આવી રહ્યા છે. ધીરેધીરે શિક્ષકોની ભરતી થઈ રહી છે. રાજ્ય સરકાર પણ આ મુદ્દે ખૂબ જ ગંભીર છે. પ્રવાસી શિક્ષકની સાથે સાથે આંતરિક બદલી અને નવી ભરતી કરીને શિક્ષકોની ઘાટને પૂરી કરવામાં આવશે. આમ આદમી પાર્ટી રજૂઆત કરવાને બદલે માત્ર હોબાળો કરીને પોતાની ફરજ કાર્ય પૂરી કરવાનો પ્રયાસ કરી રહી છે. નગર પ્રાથમિક શિક્ષણ સમિતિના વિરોધ પક્ષના સભ્ય રાકેશ હિરપરાએ જણાવ્યું કે, શિક્ષકોની ઘટ હોવા છતાં શાસકો તેને પૂરી કરી રહ્યા નથી. બાળકોના ભવિષ્યની તેમને કોઈ ચિંતા નથી. સ્ટેશનરી અને સ્કૂલ બેગ ખરીદવાનું મોટું કોઈ પણ આચરવામાં આવ્યું છે, જેને કોઈ અનુભવ નથી એવી એજન્સીને કામ આપવામાં આવ્યું છે. શાસકોના મેળાપીપળામાં ખરીદી થઈ રહી છે.

સુરત શહેરના 2020 ના વિસ્તરણ બાદ સુરત મહાનગરપાલિકા આરોગ્ય અને શિક્ષણની સેવા પર વધુ ભાર મૂકી રહી છે. શિક્ષણ સમિતિમાં શિક્ષણનું સ્તર સુધી તે માટેના પ્રયાસો સાથે સાથે શહેરના ગરીબ અને મધ્યમ વર્ગના લોકોને ઘર નજીક જ આરોગ્યની સુવિધા મળે તેવો પ્રયાસ હાથ ધરવામાં આવશે. સુરત મહાનગરપાલિકા વિસ્તારમાં નવા 40 આરોગ્ય કેન્દ્ર શરૂ કરવા માટે કવાયત શરૂ કરવામાં આવી છે જેમાં પહેલા તબક્કામાં 10 આરોગ્ય કેન્દ્ર શરૂ કરવામાં આવશે. સુરત શહેરમાં હાલના તબક્કે 60 જેટલાં અર્બન હેલ્થ સેન્ટર અને આઠ સીએચસી ચાલી રહ્યા છે અને હવે આગામી દિવસોમાં શહેરના શ્રમિક વિસ્તારોમાં પણ આરોગ્યની સુવિધાનો વ્યાપ વધારવા તથા મહત્તમ જરૂરિયાતમંદ લોકો સુધી પહોંચવાના હેતુ સાથે નાના સુવિધાયુક્ત હેલ્થ સેન્ટરો શરૂ કરવામાં આવશે.

શહેર વિસ્તારમાં 40 આરોગ્ય કેન્દ્ર પૈકી પહેલા તબક્કામાં 10 આરોગ્ય કેન્દ્ર શરૂ કરવામાં આવશે. આ આરોગ્ય કેન્દ્રમાં બ્રેસ્ટ કેન્સર, ડાયાબિટિશ, હાઇપરટેન્શન, તમાકુથી થતાં રોગોના નિદાન તથા ટેસ્ટિંગની સુવિધા ઉપરાંત યોગાની સુવિધા માટે આયોજન થઈ રહ્યું છે. પાલિકા નવા ચાલીસ હેલ્થ સેન્ટર શરૂ કરશે તેનો સમય સવારે 9 થી બપોરે 1:00 તથા સાંજે 5 થી રાત્રે 9:00 કલાકનો રહેશે. આરોગ્ય કેન્દ્રમાં એક એમબીબીએસ ડોક્ટર ઉપરાંત પાંચ કર્મચારીઓનો આરોગ્ય વિભાગનો સ્ટાફ હાજર રહેશે તે મુજબનું આયોજન કરવામાં આવી રહ્યું છે. સુરત શહેરમાં વિસ્તારમાં 20,000 ની આસપાસ વસ્તી હોય તેવા પોકેટમાં આવા આરોગ્ય કેન્દ્ર શરૂ કરવા માટે આયોજન કરવામાં આવ્યું છે અને તેના માટે તબીબ અને સ્ટાફની ભરતી માટે પણ કવાયત શરૂ થઈ ગઈ છે. પાલિકા દ્વારા બનાવવામાં આવનાર આવા હેલ્થ સેન્ટરોમાં નોનકોમ્યુનિકેબલ ડિસિઝ (એનસીબી) પ્રકારની સુવિધાઓ દરદીઓ, જરૂરિયાતમંદોને પૂરી પાડવામાં આવશે. 

સુરત શહેરમાં સ્પીડમાં ચાલતા વાહનોના કારણે રોજબરોજ અકસ્માતના બનાવો બની રહ્યા છે અને તેમાં નિર્દોષ લોકોએ જીવ ગુમાવ્યા છે. આવી જ ઘટના સુરતના અમરોલીમાંથી સામે આવી છે, જેમાં એક બાળકીનું મોત થયું છે અને અન્ય એકને ઈજા થઈ છે. બાળકીના મોત બાદ પરિવારમાં આ ઘટનાને લઈને શોકની સાથે સાથે રોષ જોવા મળી રહ્યો છે. અકસ્માત બાદ ટેમ્પોચાલક ટેમ્પો મૂકીને ફરાર થઈ ગયો હતો.

મળતી વિગતો પ્રમાણે મધ્યપ્રદેશના નિવાસી દિનેશભાઈ કટારા અમરોલી વિસ્તારમાં ગટરલાઈન નાંખવાનું કામ કરે છે અને મારુતિગામ પાસે પત્ની અને બે બાળકો સાથે રહે છે. ગત રોજ રાત્રે કચરાની ગાડીએ એમના બંને બાળકોને અડફેટે લીધા હતા. જેમાં દોઢ વર્ષના બાળકનું મોત નીપજ્યું હતું. જ્યારે બાળકીને પગના ભાગે ઈજા થઈ હતી. સમગ્ર ઘટનાની જાણ થતાં પોલીસ દોડી આવી હતી. ત્યારબાદ પિતાની ફરિયાદ લઇ વધુ કાર્યવાહી હાથ ધરી છે. હાલ તો પોલીસે ટેમ્પો નંબર આધારે ટેમ્પો ચાલકની શોધખોળ હાથ ધરી છે. જો કે, પરિવારે નાનો દીકરો ગુમાવતા પરિવારમાં શોકનો માહોલ સર્જાયો છે.

સુરત મહાનગરપાલિકામાં કોર્પોરેટરોની ગ્રાન્ટમાંથી લોકોની સુવિધા માટેના બાંકડાનો ઉપયોગ મોટાપાયે ખાનગી થઈ રહ્યો હોવાનું બહાર આવ્યું છે. એ.કે રોડ પર કોર્પોરેટર બાદ હવે ડીંડોલીમાં કોર્પોરેટરના સંબંધીએ ઘરના ટેરેસ પર બાંકડા મૂકી દીધા છે. પાલિકાના બાંકડાનો જે રીતે ખાનગી ઉપયોગ થઈ રહ્યો છે તે જોતા બાંકડા મૂકવામાં મોટું કૌભાંડ થયું હોવાની આશંકા થઈ રહી છે. એ.કે.રોડના કોર્પોરેટરે બાંકડા ટેરેસ પર ચડાવી દીધાનો વિડીયો વાયરલ થયા બાદ તેઓએ લોકોને આપવાના બદલે પાર્કિંગમાં મૂકી દીધા હોવાની ફરિયાદ થઈ છે. આ અંગેના અહેવાલ બાદ હવે કોર્પોરેટર અને ધારાસભ્યોના બાંકડાનો ખાનગી ઉપયોગ થઈ રહ્યો હોવાના ફોટા અને વિડિયો લોકો વાઇરલ કરી રહ્યા છે.

 ગઈકાલે ભટાર વિસ્તારની કેટલીક સોસાયટીમાં બાંકડા ટેરેસ પર ચડાવી દીધા હોવાની ફરિયાદ હતી તો આજે ડીંડોલીના શ્રદ્ધા સોસાયટીના એક ઘરના ટેરેસ પર આંકડા હોવાનો વિડીયો વાયરલ થયો છે. કોર્પોરેટર ભાઈદાસ પાટીલે પોતાની ગ્રાન્ટમાંથી બાંકડાઓની ખરીદી કરી હતી. આશ્ચર્યજનક રીતે વીડિયો સામે આવ્યા હતા કે, ડિંડોલી વિસ્તારમાં ભાઈદાસ પાટીલના સંબંધીના ટેરેસ ઉપર કેસરી કલરના બાંકડા ગોઠવી દેવામાં આવ્યા હતા. જેનો વીડિયો વાઇરલ થયો હતો. શહેરભરમાં ભારે ચર્ચા થતાં કોર્પોરેટરના સંબંધીએ બાંકડાને છુપાવવાનો પ્રયાસ કરતો હોવાનો વીડિયો પણ સામે આવ્યો છે. ટેરેસ ઉપરથી કોઈ તેનો વીડિયોગ્રાફી ન કરે તેના માટે તેને સફેદ રંગના કપડાથી ઢાંકી દીધો હતો.

અત્યાર સુધી સુરત મહાનગરપાલિકાના બાકડાનો ઉપયોગ કેટલા ખાનગી બિલ્ડરો કરીને સોસાયટીમાં બાંકડા મુકતા હોવાની ફરિયાદ હતી.  પરંતુ હવે આ બાકડાનો ઉપયોગ લોકો ખાનગી ધોરણે વ્યાપક રીતે કરતા હોવાનું બહાર આવી રહ્યું છે.

શાળા-કોલેજોમાં પ્રવેશ પ્રક્રિયા શરૂ થઇ ગઇ છે. ફોર્મ ભરવાની છેલ્લા તારીખ નજીક હોવાથી વાલીઓએ જાતિના દાખલા કઢાવવા માટે દોટ મૂકી છે. આ માટે નાનપુરાની સમાજ કલ્યાણની કચેરી પર સવારથી જ વાલીઓએ લાઇન લગાવી દીધી હતી. એક દાખલો લેવા વાલીઓએ 4 કલાક સુધી તાપમાં ઉભા રહેવાનો વારો આવ્યો હતો. ઘણા વાલીઓ નોકરી ધંધો છોડીને લાઇનમાં ઉભા રહેવું પડ્યું હતું. અગાઉ જાતિના દાખલા આપવાની સત્તા શાળાઓને અપાઈ હતી. જોકે, શાળાઓએ આ કામગીરી કરવામાં ઉદાસીનતા દાખવી હતી.

ઉમેશ પંચાલ, એજ્યુકેશન એક્ટિવિસ્ટએ જણાવ્યું કે ડિજિટલ ગુજરાત પોર્ટલ પોર્ટલ હોવા છતાં ઉપયોગ કેમ નથી થઇ રહીઓ છે. જો પોર્ટલ સક્રિય થાય તો વાલી પોતાના ડોક્યુમેન્ટસ અપલોડ કરી શકે અને ગવર્મેન્ટ ટોકન આપે તે તારીખે જઇને દાખલો લઇ શકાય. વાલીયો એ જણાવ્યું કે સવારથી આવી ગયા છે. જોકે અમારા પહેલા પણ ઘણા વાલીઓ આવ્યા હતા. 3 કલાકથી લાઇનમાં ઉભા છે. કંપનીમાં રજા પડવાથી અમારો પગાર પણ કપાઇ જઈ છે. એક વાલીએ જણાવ્યું કે તલાટીએ ડોક્યુમેન્ટસ માંગ્યા હતા. અને સમાજ કલ્યાણની કચેરી પર જવા કહ્યું અને મામલતદારને મળવાનું છે. જે બહાર બે દિવસથી ધક્કા ખાઉં છું.

સુરત શહેરનાં લિંબાયત ઝોન વિસ્તારમાં ગેરકાયદે પ્રાણીઓની કતલ કરતાં કસાઈઓ બેફામ બની ગયાં છે. ગેરકાયદે કતલ માટે પ્રતિબંધ હોવા છતાં લિંબાયત વિસ્તારમાં અનેક જગ્યાએ પ્રાણીઓની ગેરકાયદે કતલ થઈ રહી છે. આ ઉપરાંત બેફામ બનેલા કસાઈઓ પાલિકા કે પોલીસથી ડરતા ન હોય તેમ પાલિકાની આંગણવાડીનો ઉપયોગ કતલખાનાના ઢોરને બાંધવા માટે કરી રહ્યાં છે. આગામી દિવસોમાં ઈદનો તહેવાર આવી રહ્યો છે ત્યારે આવા માથાભારે કસાઈઓને કારણે સુરતની શાંતિમાં ભંગ પડે તેવી ફરિયાદ કરવામાં આવી છે. ભારતીય ગૌ રક્ષા મંચે સુરત પાલિકા અને પોલીસને આ અંગે ફરિયાદ કરી બેફામ બનેલા કસાઈઓને રોકવા માટેની માગણી કરી છે.

પાલિકા અને પોલીસને કરેલી ફરિયાદમાં ભારતીય ગૌરક્ષા મંચે કહ્યું છે, લિંબાયતના ખ્વાજા નગરમાં ગેરકાયદે કતલખાના આજે પણ ધમધમી રહ્યા છે. જાનવરોની કતલ બાદ વધેલા અંગોને નજીકમાંથી પસાર થતી ખાડીમાં સીધા જ નાખી દેવામાં આવે છે, જેના કારણે ભારે ગંદકી થઈ રહી છે અને ડ્રેનેજની સમસ્યા પણ વધી રહી છે. હવે બેફામ બનેલા કસાઈઓએ પાલિકાની આંગણવાડી જ્યાં નાના ભુલકાઓ જાય છે તેને પણ છોડી નથી અને પાલિકાની આંગણવાડીમાં કતલખાને આવેલા જાનવરોને બાંધી દેવામાં આવે છે. આની માઠી અસર બાળકો પર પડે છે અને સરકારી મિલ્કતનો ગેરકાયદે કતલખાના માટે ઉપયોગ થઈ રહ્યો છે. તે ઘણો જ ગંભીર અપરાધ છે તેથી આવી પ્રવૃત્તિ દૂર કરવા માટેની માગણી કરવામાં ​​​​​​​આવી છે.