સુરતઃમંગળવારઃ સુરતની ૧૬ વિધાનસભામાં આગામી તા.૧લી ડિસેમ્બરે મતદાન થશે, ત્યારે જિલ્લા મેજિસ્ટ્રેટશ્રી આયુષ ઓકે એક જાહેરનામા દ્વારા મતદાનના દિવસે મતદાન મથકોએ મતદારો શાંતિથી મત આપી શકે, મતદાન મથકથી ૨૦૦ મીટર વિસ્તારમાં કાયદો અને વ્યવસ્થા જળવાઈ રહે તે માટે નિયંત્રણો ફરમાવ્યા છે. જાહેરનામા અન્વયે સમગ્ર સુરત જિલ્લાના દરેક મતદાન મથકોએ મતદાનના દિવસે કોઈપણ પક્ષના રાજકીય પક્ષ અને ઉમેદવાર તેના ચુંટણી એજન્ટ, કાર્યકરો કે સમર્થકોએ કે અન્ય કોઈ વ્યકિતએ મતદાન મથકથી ૨૦૦ મીટરની હદમાં મતદારોને મતદાર યાદીનો ક્રમ નંબર કાઢી આપવા કે કાપલી લખી આપવા માટે તેમના કેમ્પ ઉભા કરવા પ્રતિબંધ ફરમાવ્યો છે.

મતદાન મથકે એકથી વધુ મતદાન મથકો હોય તેમ છતાં દરેક મતદાન મથકો ઉપર ૨૦૦ મીટરની બહાર ફ્કત એક કેમ્પ (જેમા એક ટેબલ અને બે ખુરશી અને છાયડા માટે છત્રી કે તાડપત્રી કે કંતાનથી (ઢાંકેલુ)) બનાવવાનું રહેશે. બુથને ચારે બાજુ કંતાન વડે બંધ કરી શકાશે નહિ. જે ઉમેદવારને આવા કેમ્પ ઉભા કરવાની ઈચ્છા હશે તેઓએ સંબંધીત ચુંટણી અધિકારીને તે કયા કયા મતદાન મથકોએ આવા કેમ્પ ઉભા કરવા માગે છે તેની યાદી આપી સ્થાનિક સત્તા મંડળની લેખિત પરવાનગી મેળવવાની રહેશે. આવા કેમ્પનો ઉપયોગ મતદાઓને ઉમેદવારના નામ કે પ્રતિક કે પક્ષના નામ વગરના સફેદ કાગળ ઉપર ચુંટણી પંચે આપેલ સૂચના મુજબની કાપલી આપવા કરી શકાશે. ઉમેદવારોના કેમ્પ સાદા હોવા જાઈએ. તેની ઉપર કોઈ પોસ્ટર, વાવટા, પ્રતિકો કે અન્ય પ્રચાર સામગ્રી પ્રદર્શીત કરી શકાશે નહિ. કેમ્પ ખાતે કોઈ ખાદ્ય સામગ્રી આપી શકાશે નહિ કે ટોળા ઉભા કરી શકાશે નહિ. આવા કેમ્પ ઉપર મતદારોના ટોળા એકત્ર થવા દેશે નહિ કે મતદાન કરી આવેલા મતદારને ઉભા રહેવા દેશે નહિ. મતદારોને મતદાન મથકે પ્રવેશ કરવામાં અડચણ ઉભી ન થાય તેનું ખાસ ધ્યાન રાખશે. ૧૦૦ મીટરની હદમાં મોબાઈલ ફોન્સ, કોર્ડલેસ ફોન્સ, વાયરલેસ સેટસ લઇ પ્રવેશ કરી શકાશે નહિ. અપવાદ તરીકે કાયદો અને વ્યવસ્થાન સાથે સંકળાયેલા અધિકારીઓ તેમજ અન્ય સ્ટાફગણને હુકમ લાગુ પડશે નહી. આ જાહેરનામું ૪/૧૨/૨૦૨૨ સુધી અમલમાં રહેશે. આ હુકમનો ભંગ કરનાર શિક્ષાને પાત્ર થશે.

પ્રાથમિક શાળાના બાળકોએ ચિત્રો, રંગોળી,પોસ્ટર બનાવી મતદાન જાગૃતિનો સંદેશ આપ્યો.

સુરતઃરવિવારઃ સુરત જિલ્લામાં સમાવિષ્ઠ વિધાનસભા મતદાર મંડળમાં તા.૧/૧૨/૨૦૨૨ ના રોજ સવારે ૮ થી સાંજે ૫ વાગ્યા સુધી મતદાનથી યોજાનારી વિધાનસભાની ચૂંટણી માટે સૂરત જિલ્લાના ગ્રામિણ વિસ્તારોમાં સૌ નાગરિકો મતદાન કરે તે માટે જિલ્લા ચૂંટણી અધિકારીશ્રી આયુષ ઓકના માર્ગદર્શન હેઠળ માંડવી, કામરેજ, ઓલપાડ, ઉમરપાડા, બારડોલી, પલસાણા, ચોર્યાસી તાલુકાના તમામ ગામોની પ્રાથમિક શાળાના વિદ્યાર્થીઓ તેમજ શિક્ષકો દ્વારા એક મતદાન જાગૃતિ રેલીનું આયોજન કરવામાં આવ્યું હતું. જેમાં સુત્રોચાર અને બેનરોથી ગામમાં મતદાન માટે સૌને જાગૃત કરવામાં આવ્યા હતા.

            આ જાગૃતિ અભિયાન માટે શિક્ષણ વિભાગના તમામ સી.આર.સી. તથા જિલ્લા પ્રાથમિક શિક્ષણ અધિકારીશ્રી દિપક દરજી દ્વારા સુચારુ આયોજન કરી રેલી તથા કાર્યક્મને સફળ બનાવ્યો હતો. જ્યારે તમામ ગ્રામિણ વિસ્તારોમાંની પ્રાથમિક શાળાના શિક્ષકોની કામગીરી સરાહનીય રહી હતી. તમામ બાળકોએ ઉત્સાહ ભેર રેલીમાં ભાગ લીધો હતો. પ્રાથમિક શાળાના બાળકોએ મતદાન જાગૃતિ માટે ચિત્રો,રંગોળી,અને પોસ્ટર પણ બનાવ્યા હતા.

યુવાનોએ જવાબદાર નાગરિક તરીકે આ ચુંટણીમાં સામૂહિક મતદાન કરવાના શપથ પણ લીધા.

સુરત:શનિવાર: કેન્દ્રીય સંચાર બ્યુરો-પાલનપુર તેમજ મુખ્ય ચૂંટણી અધિકારી-ગુજરાત દ્વારા આયોજિત તથા વીર નર્મદ યુનિવર્સિટીના સહયોગથી યુનિવર્સિટીના ગ્રંથાલય ખાતે ત્રિદિવસિય મતદાર જાગૃતિ અભિયાનના છેલ્લા દિવસે વિવિધ જનજાગૃતિ પ્રવૃત્તિઓનું રસપ્રદ આયોજન કરવામાં આવ્યું હતું. અંતિમ દિવસે સંગીતના સુરો સાથે મતદાર જાગૃતિ અભિયાનનો સમાપન કાર્યક્રમ યોજાયો હતો.

      વિશ્વની સૌથી મોટા લોકશાહી દેશ ભારતના લોકતંત્રના સૌથી મોટા અવસર સમાન આગામી ચૂંટણીમાં મોટી સંખ્યામાં લોકો ઉત્સાહભેર મતદાન કરે એ માટે વીર નર્મદ યુનિવર્સિટીમાં આયોજિત ત્રિદિવસીય મલ્ટીમીડિયા મતદાન જાગૃતિ અભિયાનનું સમાપન થયું હતું. જેમાં આજ રોજ સુરતના કિશનભાઈના ‘મનવંતર’ મ્યુઝિકલ બેન્ડ દ્વારા દેશ ભક્તિગીતોની સૂરાવલિ સાથે નવયુવાનોને જાગૃતિ સંદેશ આપવામાં આવ્યો હતો. યુવાનોએ જવાબદાર નાગરિક તરીકે આ ચુંટણીમાં સામૂહિક મતદાન કરવાના શપથ પણ લીધા હતા.
             અગ્રવાલ સમાજના સ્વયંસેવક નીરજ અગ્રવાલે યુવાઓને સોશ્યલ મીડિયાથી મિત્રો, સબંધીઓને ટેગ કરી મતદાન કરવાની અપીલ કરી હતી. યુનિવર્સિટીના એમ.કોમ અને બાયોટેક  વિભાગના વિદ્યાર્થીઓ અને અધ્યાપક તન્વી તમાકુવાલાએ મતદાર જાગૃતિ ચર્ચા અને પ્રશ્નોતરી સ્પર્ધામાં ભાગ લીધો હતો.
              અંતિમ દિને પ્રદર્શન સ્થળ પર મેહુલ ફાઉન્ડેશન-હિંમતનગરના કલાકારોએ મનોરંજન સાથે મતદાન જાગૃતિ નાટકની પ્રસ્તુતિ કરી હતી. ચર્ચા તેમજ સ્પર્ધાઓમાં સહભાગી બનેલા વિદ્યાર્થીઓ-નાગરિકોને કેન્દ્રીય સંચાર બ્યુરો-પાલનપુર દ્વારા ઈનામ આપી પુરસ્કૃત કરવામાં આવ્યા. આ સાથે સિગ્નેચર કેમ્પેઈન, સેલ્ફી પોઈન્ટ, રેલી, નાટ્ય પ્રસ્તુતિ, મતદાર જાગૃતિનો સંદેશ આપતી નોન વુવન બેગ અને મતદાન પ્રચાર સામગ્રીનું વિતરણ, મતદાન શપથ સહિતની પ્રવૃતિઓ યોજાઈ હતી. 
            સમાપન સમારોહના ઈન્ટીગ્રેટેડ કમ્યુનિકેશન એન્ડ આઉટરિચ કાર્યક્રમમાં અભૂતપૂર્વ સહયોગ બદલ સુરત જિલ્લા ચૂંટણી તંત્ર, કુલપતિશ્રી કે.એન.ચાવડા તેમજ રજિસ્ટ્રારશ્રી આર.સી.ગઢવી, યુનિવર્સિટીના તમામ વિભાગના વડાઓ, અધ્યાપકો વિદ્યાર્થીઓ, સમગ્ર સંચાલક મંડળનો માહિતી અને પ્રસારણ મંત્રાલય, ભારત સરકારના કેન્દ્રીય સંચાર બ્યુરોના પ્રચાર અધિકારી શ્રી જે.ડી.ચૌધરીએ આભાર વ્યક્ત કર્યો હતો. 

દિવ્યાંગ મતદાન મથકમાં ચૂંટણીલક્ષી તમામ ફરજો દિવ્યાંગ કર્મચારીઓ નિભાવશે.

‘ઈન્ક્લુઝિવ ઈલેક્શન્સ’ના ધ્યેય સાથે સમાજના તમામ વર્ગોને ચૂંટણી પ્રક્રિયામાં સમાન તકો મળે તેવો શુભાશય.

સુરત:શનિવાર: વિધાનસભા સામાન્ય ચૂંટણી-૨૦૨૨ દરમિયાન વધુમાં વધુ મતદાન થાય, મહત્તમ મતદારો મતાધિકારનું મૂલ્ય સમજી મતદાન કરવા પ્રેરાય એ માટે સુરત જિલ્લા ચૂંટણી તંત્ર સક્રિય પ્રયાસો કરી રહ્યું છે. આ દિશામાં સમગ્ર રાજ્યમાં ચૂંટણી તંત્ર દ્વારા વિશેષ પ્રયાસો અને નવતર પ્રયોગના ભાગરૂપે આ વખતે સુરત જિલ્લાની તમામ ૧૬ વિધાનસભામાં દિવ્યાંગ કર્મચારીઓ સંચાલિત ૧-૧ દિવ્યાંગ મતદાન મથકોની રચના કરવામાં આવી છે.

           ‘ઈન્ક્લુઝિવ ઈલેક્શન્સ’ના ધ્યેય સાથે સમાજના તમામ વર્ગોને ચૂંટણી પ્રક્રિયામાં સમાન તકો મળે તે હેતુથી વિધાનસભાની ચૂંટણી દરમિયાન રાજ્યના કુલ-૧૮૨ મતદાન મથકો દિવ્યાંગ સંચાલિત હશે એટલે કે રાજ્યના પ્રત્યેક મતદાર વિભાગ દીઠ એક દિવ્યાંગ મતદાન મથક બનાવવામાં આવશે. આ મતદાન મથકોમાં પોલીંગ સ્ટાફ જેમ કે પ્રિસાઈડીંગ ઑફિસર તથા પોલીંગ ઓફિસર તરીકે દિવ્યાંગ અધિકારી/કર્મચારીઓની નિયુક્તિ કરવામાં આવશે. 
               દિવ્યાંગ સશક્તિકરણને પ્રોત્સાહિત કરતા આવા મતદાન મથકોની સુરત જિલ્લાની વિગતો જોઈએ તો  ૧૫૫-ઓલપાડ વિધાનસભામાં ઓલપાડ તાલુકાના સોંદલાખારા ગામે પ્રા.શાળામાં બુથ નં.૬૯, ૧૫૬-માંગરોળ વિધાનસભામાં માંગરોળ તાલુકાના મોસાલી-૧ ગામે પ્રા.શાળામાં બૂથ નં.૫૨, ૧૫૭-માંડવી વિધાનસભામાં માંડવી તાલુકાના વરઝાખણ-૧ ગામે પ્રા.શાળામાં બુથ નં.૧૮૮, ૧૫૮-કામરેજ વિધાનસભામાં કામરેજ તાલુકામાં વિઝ્ડમ ઈન્ટરનેશનલ શાળામાં બુથ નં. ૩૫, ૧૫૯-સુરત પૂર્વ વિધાનસભામાં નાનપુરામાં જીવનભારતી હાયર સેકન્ડરી શાળાના બુથ નં.૧૭૪, ૧૬૦ સુરત ઉત્તર વિધાનસભામાં કતારગામ ખાતે સુમન હાઈસ્કુલમાં બુથ નં.૨૩, ૧૬૧-વરાછા વિધાનસભામાં કાપોદ્રાની સાધના વિદ્યાલય પ્રાઈમરી શાળામાં બુથ નં.૨૪, ૧૬૨-કરંજ વિધાનસભામાં નવચેતન વિદ્યાલયમાં બુથ નં.૪૫, ૧૬૩-લિંબાયત વિધાનસભામાં ડુંભાલ ખાતે શારદા વિદ્યાલયમાં બુથ નં.૯૭, ૧૬૪-ઉધના વિધાનસભામાં આર.એન.નાયક બુથ નં.૮૫, ૧૬૫-મજુરા વિધાનસભામાં અઠવાલાઈન્સ ખાતે લૂડ્ઝ કોન્વેન્ટ શાળામાં બુથ નં.૮, ૧૬૬- કતારગામ વિધાનસભામાં સિંગણપુર ખાતે નાગરા પ્રાથમિક શાળામાં બુથ નં.૬૮, ૧૬૭-સુરત પશ્ચિમ વિધાનસભામાં જહાંગીરાબાદ ખાતે પોદ્દાર ઈન્ટરનેશનલ શાળામાં બુથ નં.૨૧, ૧૬૮-ચોર્યાસી વિધાનસભામાં વેસુ ખાતે હિલ્સ હાઈસ્કૂલમાં બુથ નં.૪૧૦, ૧૧૯-બારડોલી વિધાનસભામાં ખોજ ગામે ખોજપારડી પ્રાથમિક શાળામાં બુથ નં.33 તેમજ ૧૭૦-મહુવા વિધાનસભામાં કાછલ ગામે પ્રાથમિક શાળામાં બુથ નં.૧૭૨ને દિવ્યાંગ કર્મચારીઓ સંચાલિત મતદાન મથકો બનાવવામાં આવ્યા છે.
             આ મથકોમાં ચૂંટણીલક્ષી તમામ ફરજો દિવ્યાંગ કર્મચારીઓ દ્વારા નિભાવવામાં આવશે. આ પ્રયોગથી દિવ્યાંગ સશક્તિકરણનું ઉત્તમ ઉદાહરણ તો પૂરું પાડવામાં આવશે જ સાથે લોકશાહીના પર્વમાં પોતાનું અમૂલ્ય યોગદાન હોવાની સંતોષકારક લાગણી પણ દિવ્યાંગજનો અનુભવશે.

યુવાનોને બંધારણના મહત્વથી માહિતગાર કરાયા: મુંબઈના ૨૬/૧૧ આતંકવાદી હુમલામાં શહીદ થયેલા વીર જવાનોને શ્રદ્ધાંજલિ અપાઈ.

સુરત:શનિવાર: ભારત સરકારની સંસ્થા નેહરુ યુવા કેન્દ્ર- સુરત દ્વારા ભારતીય બંધારણ દિવસ નિમિત્તે યુવાઓમાં દેશના બંધારણ પ્રતિ જાગૃત્તિ, યુવાઓના હક-અધિકાર, કર્તવ્યબોધ વિકસે એવા હેતુસર પલસાણા તાલુકાના SDJ ઈન્ટરનશનલ કૉલેજમાં ‘આવો આપણા બંધારણને જાણીએ’ વિષય પર જનજાગૃત્તિ કાર્યક્રમ યોજાયો હતો. જેમાં પલસાણા તાલુકાના ૧૫૦થી વધુ યુવાઓ-છાત્રો અને ગ્રામજનોએ ઉત્સાહભેર ભાગ લીધો હતો.

       કાર્યક્રમમાં ઉપસ્થિત સૌને બંધારણની ઝલક દર્શાવી બંધારણની પ્રસ્તાવનાથી વાકેફ કરવામાં આવ્યા હતા. સાથોસાથ ‘આપણું બંધારણ’ વિષય પર ક્વિઝ અને વક્તૃત્વ સ્પર્ધા યોજવામાં આવી હતી. કાર્યક્રમ દરમિયાન મુંબઈ ખાતે ૨૬/૧૧ આતંકવાદી હુમલામાં શહીદ થયેલા વીર જવાનોને શ્રદ્ધાંજલિ અર્પણ કરવામાં આવી હતી. 
              આ પ્રસંગે જિલ્લા યુવા અધિકારી સચિન શર્મા, તાલુકા સ્વાસ્થ્ય અધિકારી ડૉ.મધુ કુમાર, SDJ કોલેજના સંજય જોશી પ્રધાનાચાર્ય ઉપસ્થિત રહ્યા હતા. કાર્યક્રમનું સંચાલન સ્વયંસેવક સત્યેન્દ્ર યાદવે કર્યું હતું. 

સ્ટેટિક સર્વેલન્સ ટીમ, આઈ.ટી. વિભાગ તથા પોલીસ વિભાગની સરાહનીય કામગીરી

સુરતઃશુક્રવારઃ ગુજરાત વિધાનસભા સામાન્ય ચૂંટણી-૨૦૨૨નું પ્રથમ ચરણ મતદાન આગામી તા.૦૧ લી ડિસેમ્બર તથા દ્વિતીય ચરણનું તા.૦૫મી ડિસેમ્બરના રોજ સવારે ૦૮ઃ૦૦ થી સાંજે ૦૫ઃ૦૦ વાગ્યા સુધી મતદાન યોજાનાર છે. ત્યારે ગત તા.૦૩/૧૧/૨૨થી આદર્શ આચાર સંહિતા અમલમાં આવતા ચૂંટણી પ્રક્રિયા મુક્ત અને ન્યાયી વાતાવરણમાં યોજાય તે હેતુસર કાયદો અને વ્યવસ્થા જળવાઈ રહે તે માટે જિલ્લા ચૂંટણી અધિકારીશ્રી આયુષ ઓકના માર્ગદર્શન હેઠળ સમગ્ર સુરત જિલ્લામાં જુદી જુદી ટીમો કાર્યરત છે.

         ગુજરાત નશાબંધી અધિનિયમ,૧૯૪૯ અન્વયે રાજયમાં તા.૦૩/૧૧/૨૦૨૨ થી તા.૨૫/૧૧/૨૦૨૨ સુધી ૧૧,૬૦૨ લીટર દેશી દારૂ જેની કિંમત ૨,૩૨,૪૨૪/-તેમજ ભારતીય બનાવટનો વિદેશી દારૂ (IMFL) ૪૧,૪૧૭ બોટલ જેમાં ૧૬,૩૬૩.૭૮ લીટર દારૂ મળીને જેની કિંમત રૂ. ૯૪,૧૧,૩૮૬/- તેમજ અન્ય ચીજ-વસ્તુઓ જપ્ત કરવામાં આવી છે. જેમાં સુરત શહેર પોલીસે રૂ. ૪૦,૭૧,૦૧૦/- નો દારૂ તથા સુરત ગ્રામ્ય પોલીસે રૂ. ૮૧,૫૦,૫૩૨/- નો દારૂ મળીને કુલ રૂપિયા રૂ. ૧,૨૨,૨૧,૫૪૨/- નો મુદ્દામાલ જપ્ત કરવામાં આવ્યો હતો. 
        સમગ્ર સુરત જિલ્લામાં કાર્યરત Static Surveillance Teams દ્વારા ૧૬૫-મજુરા વિધાનસભા મતવિસ્તાર માંથી ૫૫,૨૮,૦૦૦/- રોકડ રકમ, ૧૫૯- સુરત પૂર્વ વિધાનસભા મતવિસ્તાર માંથી ૧૭,૦૦,૦૦૦/- રોકડ, આઈ.ટી. દ્વારા મહિધરપુરા વિસ્તારથી ૧,૬૦,૦૦,૦૦૦/- તથા આઈ.ટી. ઈન્વેસ્ટિગેશન અને પોલીસ દ્વારા ૬૩,૮૮,૭૦૦/- મળીને સુરત શહેર સહિત જિલ્લા માંથી કુલ ૨,૯૬,૧૬,૭૦૦/- રૂપિયાની રોકડ રકમ જપ્ત કરીને આચાર સંહિતાનો કડક અમલ કરવામાં આવ્યો છે. 
             આ ઉપરાંત સાથો સાથે ઈન્કમ ટેક્સ ઈન્વેસ્ટિગેશન તથા પોલીસ દ્વારા ૧ કિલો ગ્રામ જ્વેલરી જેની કિંમત રૂ. ૫૪,૦૫,૦૦૦/- તથા ૧૬૦ - સુરત ઉત્તર વિધાનસભા વિસ્તાર માંથી ૩૭,૫૮,૫૬૫/- ની જ્વેલરીની સાથે અન્ય સોનાની જ્વેલરી તથા અન્ય ચીજ વસ્તુઓ સાથે ૪.૧૭ કિલો ગ્રામ જવેલરી જપ્ત કરવામાં આવ્યું છે જેની કુલ ૨,૫૭,૯૦,૫૬૫/- રૂપિયાનો મુદ્દામાલ જપ્ત કરવામાં આવ્યો હતો. 

કેન્દ્રીય સંચાર બ્યુરો-પાલનપુર અને રાજ્યના મુખ્ય ચૂંટણી અધિકારી દ્વારા વીર નર્મદ યુનિવર્સિટીના સહયોગથી યુનિવર્સિટીના ગ્રંથાલય ખાતે ત્રિદિવસિય મતદાર જાગૃત્તિ અભિયાનનો પ્રારંભ

સિગ્નેચર કેમ્પેઈન,સેલ્ફી પોઇન્ટ, રેલી, મ્યુઝિકલ બેન્ડ શો, સંવાદ, શેરી નાટક, શપથ, વિભિન્ન સ્પર્ધાઓ સાથે બહુવિધ કાર્યક્રમો યોજાશે

સુરતઃગુરૂવારઃ વિધાનસભા ચૂંટણી-૨૦૨૨ અંતર્ગત લોકો વધુમાં વધુ મતદાન કરીને લોકશાહીના પર્વમાં સહભાગી થાય તેવા હેતુ સાથે ભારત સરકારના માહિતી અને પ્રસારણ મંત્રાલયના કેન્દ્રીય સંચાર બ્યુરો-પાલનપુર અને રાજ્યના મુખ્ય ચુંટણી અધિકારી દ્વારા ‘અવસર લોકશાહીનો’ અભિયાન અંતર્ગત વીર નર્મદ યુનિવર્સિટીના ગ્રંથાલય ખાતે આયોજિત ત્રિ-દિવસીય મલ્ટીમિડીયા ફોટો પ્રદર્શનને જિલ્લા ચુંટણી અધિકારીશ્રી ડો.આયુષ ઓકના હસ્તે ખૂલ્લું મૂકવામાં આવ્યું હતું. ત્રણ દિવસ દરમિયાન સિગ્નેચર કેમ્પેઈન,સેલ્ફી પોઇન્ટ, રેલી, મ્યુઝિકલ બેન્ડ શો, સંવાદ, શેરી નાટક, શપથ, વિભિન્ન સ્પર્ધાઓ સાથે બહુવિધ કાર્યક્રમો યોજાશે
આ પ્રસંગે જિલ્લા કલેકટરશ્રીએ આયુષ ઓકે જણાવ્યું કે, ચૂંટણી એ લોકશાહીનું મહાપર્વ છે,ત્યારે તેમાં મહત્તમ મતદાન થાય અને ખાસ કરીને યુવા મતદારો તેમના મતાધિકારનો ઉપયોગ કરીને લોકશાહીને મજબૂત બનાવવા સહભાગી થાય તે માટે જાગૃત્તિ ફેલાવતા આ પ્રદર્શનનું આયોજન સરાહનીય છે.
વધુમાં કલેકટરશ્રીએ જણાવ્યું કે, સુરત જિલ્લામાં ૧૮ વર્ષ અને તેથી વધુ વયના નવા નોંધાયેલા યુવા મતદારો તથા ૮૦ વર્ષથી વધુની વયના વરિષ્ઠ મતદારોના સહયોગથી મહત્તમ મતદાન થાય અને આપણે સો ટકા મતદાનનું લક્ષ્યાંક હાંસલ કરી શકીએ તે માટે ચૂંટણી પંચ અને જિલ્લા ચૂંટણીતંત્ર દ્વારા પણ સક્રિય પ્રયાસો હાથ ધરવામાં આવ્યા છે. સાથે જ તેમણે સૌ કોઈને મતદાન કરીને આપણા રાષ્ટ્ર પ્રત્યેની નૈતિક ફરજ અદા કરવાની અપીલ કરી હતી.
આ મતદાતા જાગૃત્તિ અભિયાન અંતર્ગત કેન્દ્રીય સંચાર બ્યુરો પાલનપુર દ્વારા નર્મદ યુનિવર્સિટીના સહયોગથી બહુવિધ કાર્યક્રમો યોજાશે, જેમાં તા.૨૪ થી ૨૬ નવેમ્બર સુધી મતદાન જાગૃત્તિ અભિયાનના ફોટો પ્રદર્શનની સાથે જ અગ્રીમ પ્રચારના ભાગરૂપે યુનિવર્સિટીના વિવિધ વિભાગોમાં યોજાયેલી સ્પર્ધાઓના વિજેતાઓને કેન્દ્રીય સંચાર બ્યુરો-પાલનપુર દ્વારા ઇનામ આપી પુરસ્કૃત કરવામાં આવ્યા હતા.
આ ઉપરાંત મતદાર જાગૃત્તિ રેલી, નાટ્ય પ્રસ્તુતિ, મતદાર જાગૃત્તિનો સંદેશ આપતી નોન વુવન બેગનું વિતરણ, મતદાન તેમજ ચૂંટણી વિશેની માહિતી આપતી સામગ્રીનું વિતરણ કરાયું હતું. આ વેળાએ ઉપસ્થિત તમામ નાગરિકોને મતદાન પ્રતિજ્ઞા પણ લેવડાવવામાં આવી હતી.
આ પ્રસંગે વીર નર્મદ યુનિવર્સિટીના કુલપતિ કિશોરસિંહ ચાવડા, રજિસ્ટ્રાર આર.સી.ગઢવી, ચોર્યાસી મામલતદાર જે.ડી. પટેલ, માહિતી અને પ્રસારણ મંત્રાલય, ભારત સરકારના પ્રચાર અધિકારી જે.ડી. ચૌધરી સહિત નર્મદ યુનિવર્સિટીના વિવિધ વિદ્યાશાખાના વિદ્યાર્થીઓ ઉપસ્થિત રહ્યા હતા.

 મેડિકલ પ્રિસ્ક્રીપ્શન વિના જાતે જ એન્ટીબાયોટિક દવાઓ લેવી શરીર માટે હાનિકારક છે

 ખાનગી હોસ્પિટલો પણ એન્ટીબાયોટિક પોલિસી બનાવે તે અતિ આવશ્યક: ડો.સુમેયા મુલ્લા, માઈક્રોબાયોલોજી વિભાગના વડા

નવી સિવિલ તંત્ર દ્વારા સપ્તાહ દરમિયાન જનજાગૃત્તિ પ્રવૃત્તિઓ હાથ ધરવામાં આવી

સુરતઃગુરૂવારઃ સરકારી મેડિકલ કોલેજ-સુરત અને નવી સિવિલ હોસ્પિટલના ડિપાર્ટમેન્ટ ઓફ માઈક્રોબાયોલોજીના સંયુક્ત ઉપક્રમે તા.૧૮ થી ૨૪ નવે.- ‘વર્લ્ડ એન્ટીમાઈક્રોબિઅલ્સ અવેરનેસ વીક (વિશ્વ સૂક્ષ્મ જીવાણુ પ્રતિરોધક જનજાગૃત્તિ સપ્તાહ)ની ઉજવણી કરવામાં આવી હતી. GSBTM-ગુજરાત સ્ટેટ બાયોટેકનોલોજી મિશન, DST- સાયન્સ અને ટેકનોલોજી વિભાગના સહકારથી આયોજિત જાગૃત્તિ સપ્તાહના અંતિમ દિને નવી સિવિલના ફિઝીયોલોજી વિભાગના સભાગૃહમાં ‘સૂક્ષ્મ જીવાણુ પ્રતિરોધ, સુપરબગ્સ અને વન હેલ્થ’ વિષય પર નેટવર્ક પ્રોગ્રામ યોજાયો હતો. જેમાં માઈક્રોબાયોલોજી, પેથોલોજી, બાયોકેમ વિભાગના વિદ્યાર્થીઓ તેમજ તબીબી અને ટેકનિકલ સ્ટાફને માર્ગદર્શન અપાયું હતું.
કાર્યક્રમમાં નવી સિવિલના માઈક્રોબાયોલોજી વિભાગના વડા ડો.સુમેયા મુલ્લાએ જણાવ્યું હતું કે, વ્યવસ્થિત રીતે હાથ ધોવાથી ૭૦ ટકા ઈન્ફેક્શન રોકી શકાય છે. મેડિકલ પ્રિસ્ક્રીપ્શન વિના જાતે જ એન્ટીબાયોટિક દવાઓ લેવી શરીર માટે હાનિકારક છે. ઈન્ફેકશન થાય, શરીરમાં કોઈ સમસ્યા થાય એ માટે ટેસ્ટ કરાવીને દવા લેવી જોઈએ. ખાનગી હોસ્પિટલો પણ એન્ટીબાયોટિક પોલિસી બનાવે તે અતિ આવશ્યક છે. જેમાં લોકોને જાતે જ પ્રિસ્ક્રીપ્શન વિના દવા લેવાથી થતા નુકસાન વિષે જાગૃત્ત કરવા જોઈએ. જેથી દર્દીઓના જીવન બચાવી શકાશે.
ડો.સુમેયા મુલ્લાએ વધુમાં કહ્યું કે, એન્ટીબાયોટિક્સના વ્યવહારૂ અને તાર્કિક ઉપયોગને પ્રોત્સાહન આપવા માટે ડાયગ્નોસ્ટિક લેબોરેટરીઝને મજબૂત કરવાની, તેમાં સુધારા કરવાની તેમજ લોકજાગૃત્તિ કેળવવાની જરૂર છે. પશ્ચિમના દેશોમાં એન્ટીબાયોટીક દવાઓનો નિયંત્રિત ઉપયોગ કરવામાં આવે છે. એન્ટીમાઈક્રોબિયલ પ્રિસ્ક્રિપ્શન ધારણા આધારિત નહીં,પરંતુ ચોક્કસ નિદાન આધારિત હોવું જોઈએ એમ જણાવી તબીબોની સલાહ વિના એન્ટીબાયોટિક દવાઓનું સેવન ન કરવા પર ભાર મૂક્યો હતો.
ડો.સંગીતા રેવડીવાલા, ડો.ક્રિસ્ટી અને ડો.વિદિશાએ રોગોને ફેલાવતા બેક્ટેરિયાથી બચવાની કાળજી અને તકેદારી અંગે ઉપયોગી સમજ આપી હતી.
જુનિયર રિસર્ચ ફેલો દક્ષિતા માંડાણી અને દિપાલી મિસ્ત્રીએ હેન્ડ હાઈજીન ડેમોન્સ્ટ્રેશન કરીને હાથ ધોવાની યોગ્ય રીતો સમજાવી હતી. રેસિડેન્ટ તબીબોએ PG વિદ્યાર્થીઓને વિષય અનુરૂપ ક્વિઝ સ્પર્ધા યોજી હતી અને તેમના જ્ઞાનમાં વધારો કર્યો હતો. એસો.પ્રોફેસર ડો.તન્વી સુખારામવાલાએ વન હેલ્થ વિષય પર ઉપયોગી માર્ગદર્શન આપ્યું હતું.
સપ્તાહ દરમિયાન સિવિલના તમામ વોર્ડમાં, ઓપીડીમાં જનજાગૃત્તિ અભિયાન હાથ ધરવા સાથે PG વિદ્યાર્થીઓ માટે ક્વિઝ સ્પર્ધા અને ઈનામ વિતરણ, MICU, NICU અને SICU સ્ટાફને AMR જાગૃતિ અને હેન્ડ હાઈજીન, નર્સિંગ સ્ટાફ અને વિદ્યાર્થીઓ માટે પોસ્ટર મેકિંગ-ઈનામ વિતરણ અને આરોગ્ય વિષયક તાલીમ, નવી સિવિલના માઈક્રોબાયોલોજી વિભાગમાં પોસ્ટરો દ્વારા જનજાગૃત્તિ જેવી પ્રવૃત્તિઓ હાથ ધરવામાં આવી હતી.