આમ આદમી પાર્ટીએ સુરતનાં ભાજપનાં મહિલા કાઉન્સિલર દ્વારા તેમના વિસ્તારમાં બાંધકામ કરવા માટે પૈસાની માગણી કરી હોવાનો સ્ટિંગ ઓપરેશનનો વીડિયો જાહેર કર્યો છે. પ્રદેશ પ્રમુખ ઇસુદાન ગઢવી અને સુરત મ્યુનિસિપલ કોર્પોરેશનના વિપક્ષના નેતા ધર્મેશ ભંડેરીએ પ્રેસ-કોન્ફરન્સ કરીને આ વીડિયો જાહેર કર્યો હતો. સ્ટિંગ ઓપરેશન મુદ્દે ધર્મેશ ભંડેરીએ જણાવ્યું હતું કે સુરત મહાનગરપાલિકાનાં ભાજપનાં એક મહિલા કાઉન્સિલર વૈશાલી પાટીલ (વોર્ડ નંબર 29) તથા તેમના પતિ રાજેન્દ્ર પાટીલ અને ભરતભાઈએ પોતાના વિસ્તારમાં બાંધકામ કરવા માટે એક કાઉન્સિલરદીઠ 40 હજાર રૂપિયા અને ચાર કાઉન્સિલર એટલે કે વૈશાલી પાટલી, સુધાબેન પાંડે, બંશુ યાદવ અને કનુ પટેલના કુલ 1.60 લાખ રૂપિયા રાઉન્ડ ફિગરમાં એક લાખ પચાસ હજાર રૂપિયા માગ્યા છે. મહાનગરપાલિકાના અધિકારીને પણ ત્રણ લાખ ચૂકવવા પડશે. ભાજપના કાઉન્સિલર દ્વારા મહાનગરપાલિકાના અધિકારીને બદનામ કરવાનું ષડયંત્ર છે. આ સ્ટિંગ ઓપરેશનમાં કોઈ અધિકારીનું નામ લેવામાં આવ્યું નથી. સુરતની જનતા અને સાથે સાથે ગુજરાત તેમજ દેશની જનતાએ સમજવાની જરૂર છે કે તમે જેમને ચૂંટીને મોકલો છો તેઓ સુવિધાના કામને પ્રાથમિકતા આપવાની જગ્યાએ પોતાનાં ખિસ્સાં ભરવાના કામને પ્રાથમિકતા આપે છે.

તેમણે વધુમાં જણાવ્યું હતું કે આ ઘટનામાં જે પીડિત વ્યક્તિ છે તેણે થોડા સમય પહેલાં અમારી સમક્ષ આ બાબતની વ્યથા રજૂ કરી હતી. તેમણે તારીખ 5 એપ્રિલ 2023ના રોજ અમદાવાદ એસીબીને લેખિતમાં ફરિયાદ કરી હતી. લેખિત ફરિયાદને આજે અઢી મહિના જેટલો સમય થઈ ગયો તો પણ કોઇપણ પ્રકારનાં પગલાં લેવામાં આવ્યાં નથી. ગુજરાતની ભાજપ સરકાર અને એસીબી સમક્ષ અમારી માગણી છે તેમજ ગુજરાત પોલીસને પણ વિનંતી કરીએ છીએ કે આટલા મજબૂત પુરાવા હોવા છતાં ભાજપના કાઉન્સિલર પર કોઈપણ પ્રકારનાં પગલાં લેવાયાં નથી. આ બાબતની તપાસ થવી જોઇએ. અમે પીડિત વ્યક્તિનું નામ નહીં જણાવી શકીએ. જો એસીબી ધારે તો તેમનું નામ જાહેર કરી શકે છે અથવા તો ગુપ્ત રાહે પણ તપાસ કરી શકે છે. આમાં જે પણ લોકો આરોપી છે તેમની પર કાર્યવાહી પણ કરી શકે છે. તેમણે વધુમાં જણાવ્યું હતું કે અમે કોઈના પર કોઈ આરોપ નથી મૂકતા, પરંતુ અમે એસીબી સમક્ષ માગણી કરીએ છીએ કે તમામ આરોપોની તપાસ થાય અને એસઆઇટીની રચના કરીને તપાસ કરીને જે પણ લોકો ગુનેગાર છે તેમને જેલમાં મોકલવામાં આવે. આમ આદમી પાર્ટી ભ્રષ્ટાચારને જરા પણ સહન કરતી નથી. દિલ્હી અને પંજાબમાં આમ આદમી પાર્ટીની સરકારે પોતાના મંત્રીઓ પર પણ કાયદાકીય કાર્યવાહીઓ કરી છે.

તેમણે વધુમાં જણાવ્યું કે એસીબીએ એક વખત એક છટકું ગોઠવ્યું હતું, પરંતુ મહિલા કાઉન્સિલર અને તેમના મળતિયા ભરતભાઈ એ સમયે આવ્યા નહીં. તો મારો સવાલ એ પણ છે કે એસીબીએ છટકું ગોઠવ્યું છે એની જાણ આ લોકોને કઈ રીતે થઈ? આમ આદમી પાર્ટીના કે વિપક્ષના કોઈ નેતા કોઈ સામાન્ય વાત કરે તો પણ તેમના પર ફરિયાદ થઈ જાય છે, તો આ લોકો પર અત્યારસુધી તપાસ કેમ નથી થઈ? આ બાબતમાં ફરિયાદીને એક વખત જવાબ લખવા માટે પણ બોલાવ્યા હતા. ગયા મહિનાની 4 તારીખે તેમણે પોતાનો જવાબ પણ લખાવી દીધો છે અને તેમ છતાં હજુ સુધી કોઈ કાર્યવાહી કરવામાં આવી નથી. વીડિયોમાં લાલ કલરના શર્ટમાં કાઉન્સિલરના પતિ રાજેન્દ્ર પાટીલ છે તથા જે બેન દેખાય છે તે વોર્ડ નંબર 29નાં ભાજપનાં કાઉન્સિલર વૈશાલી પાટીલ છે. ટીશર્ટમાં દેખાતી વ્યક્તિ ભરત પટેલ છે, જે તેમના મળતિયાના રૂપે કામ કરે છે.

આમ આદમી પાર્ટીના ગુજરાત પ્રદેશ પ્રમુખ ઇસુદાન ગઢવીએ મીડિયા સમક્ષ પોતાની વાત રજૂ કરતાં જણાવી કે વીડિયોમાં સ્પષ્ટપણે દેખાય છે કે કોર્પોરેટર દ્વારા નાણાંની માગણી કરવામાં આવી છે. એસીબીમાં ફરિયાદ થઈ છે અને એસીબીએ છટકું ગોઠવ્યું તો એની માહિતી પણ તે લોકોને પહોંચી ગઈ છે. એનો મતલબ એમ છે કે સિસ્ટમ ફૂટેલી છે. એસીબીને લેખિતમાં ફરિયાદ કર્યા છતાં પણ એસીબીએ કોઈ કાર્યવાહી નથી કરી. એનો મતલબ એવો ગણી શકાય કે સુરતના કોઈ મોટા નેતાએ એસીબી પર કોઈ દબાણ કર્યું હોય એવું સ્પષ્ટપણે દેખાઈ રહ્યું છે. વારંવાર આપણે જોતા આવ્યા છીએ કે ભાજપના નેતાઓ દ્વારા આમ આદમી પાર્ટીના કોર્પોરેટરોને તોડવાની કોશિશ કરવામાં આવે છે અને તેઓ લાલચ આપે છે કે આમ આદમી પાર્ટીમાં રહીને ભ્રષ્ટાચાર નહીં કરી શકો તો ભાજપમાં આવી જાઓ, અહીં મહિને પાંચ લાખ રૂપિયાનો તોડ પણ કરવા મળશે અને જો કોઈ એસીબીમાં ફરિયાદ કરી દે તો ઉપરના નેતાઓ પણ એસીબીને ફોન કરીને જાણ કરી દે છે કે આમને પકડવાના નથી.

ભાજપમાં નેતાઓ કહેતા હોય છે કે આપણે નરેન્દ્ર મોદીના નામે વોટ માગીને જીતી જવાના છીએ અને જેટલો પણ ભ્રષ્ટાચાર કરીશું એને લોકો ભૂલી જવાના છે. આજે દરેક જગ્યા પર ભ્રષ્ટાચાર છે અને કમિશન આપ્યા વગર કામ થતું નથી. તપાસના નામે પણ કંઈ થતું નથી. હું સીઆર પાટીલને વિનંતી કરું છું કે તેઓ આ ભ્રષ્ટાચારના મુદ્દે ખુલાસો કરે કે તેઓ શું માને છે. તેમણે જણાવવું પડશે કે તેઓ આ કોર્પોરેટરોને ચાલુ રાખવા માગે છે કે સસ્પેન્ડ કરવા માગે છે અને જો તેમને ચાલુ રાખવામાં આવશે તો એનો સ્પષ્ટ મતલબ થાય છે કે તેઓ ભ્રષ્ટાચારને પ્રોત્સાહન આપી રહ્યા છે.અમારી માગણી છે કે SITની રચના કરવામાં આવે અને એમાં હાઇકોર્ટના નિવૃત્ત જજના અંતર્ગત તપાસ થાય, કારણ કે અમને એસીબીમાં પણ ગડબડ હોય એવું લાગી રહ્યું છે, આ સાચું છે કે ખોટું એ તો તપાસમાં બહાર આવશે. અમારા વિપક્ષના નેતાએ પણ પુરાવા એકઠા કર્યા છે. ગુજરાતમાં ક્યાંય પણ ભ્રષ્ટાચાર થતો હોય તો અમે એને જોઈને બેસી રહીશું નહીં. આમ આદમી પાર્ટીના કોર્પોરેટરોને ભાજપના નેતાઓ વારંવાર કરી રહ્યા છે કે 50 લાખથી એક કરોડ રૂપિયા લઈને ભાજપમાં આવી જાઓ અને ત્યાર બાદ તમે ભાજપમાં આવીને લૂંટ ચલાવો.

સુરત મહાનગરપાલિકા દ્વારા નવાગામ ડિંડોલી ભરવાડ નગરના સ્ટ્રીટ લાઈટના એસએચ એલ 46 નંબરના પોલમાં વાયર ખુલ્લા રાખવામાં આવ્યો હોવાથી ઘટના બની છે. ઘટનામાં કરંટ લાગતા 2 અબોલ જીવ મૃત્યુ પામ્યા છે. કરંટ લાગવાને કારણે ત્યાંથી પસાર થતી બે ગાયનું મોત થયું. ગાયને લઈ જનાર ત્યાંના વ્યક્તિનો પણ આ બાદ બચાવ થયો હતો. તેને કરંટ લાગે તે પહેલા જ તે પશુઓથી દૂર જતો રહ્યો હતો. પાછળ ચાલતા વ્યક્તિ અને બીજા 2 ગાયના જીવ બચી ગયા છે. સ્ટ્રીટ લાઇટની વારંવાર કમ્પ્લેન કર્યા છતાં કોઈ કાર્યવાહી કરાઈ નથી.

ભરવાડનગરમાં રહેતા મેહુલ ભરવાડે જણાવ્યું હતું કે, વારંવાર આ વીજ પોલ અંગે સ્થાનિક નેતાઓને અને અધિકારીઓને પણ જાણ કરવામાં આવી હતી. વીજપોલ ઉપરની લાઈટ દિવસ અને રાતે સતત ચાલુ રહેતી હતી. તેમજ તેના જે વાયર હતા, તે પણ ખુલ્લા હતા. આ બાબતે કોઈ મોટી ઘટના બની શકે છે. આ પ્રકારની વાત અમે કરી હતી, પરંતુ તેને ગંભીરતાથી લેવાય નથી. બે ગાયે જીવ સુરત મહાનગરપાલિકાના કારણે ગુમાવ્યા છે. પશુપાલક ખૂબ જ ગરીબ હોવાથી તેને આર્થિક રીતે કોર્પોરેશન દ્વારા મદદ આપવી જરૂરી છે. ચોમાસા દરમિયાન આ પ્રકારની ઘટના બને તો અહીં રમતા બાળકોનો તેમજ અન્ય અહીંથી પસાર થતા લોકોનો પણ જીવ જોખમમાં મુકાય શકે છે.

સુરત પોલીસ દ્વારા શાંત અને સલામત સુરત તથા નો ડ્રગ્સ ઇન સુરત ઝૂંબેશ ચલાવવામાં આવી રહી છે. જે અંતર્ગત ગુનેગારો સામે કડક કાર્યવાહી કરવામાં આવી રહી છે. આ ઉપરાંત શહેરમાં ગુનાખોરી અટકાવવા માટે ઝોન 5 કાર્યક્ષેત્ર હેઠળના ઉત્રાણ, અમરોલી, જહાંગીરપુરા, રાંદેર, અડાજણ, પાલ પો.સ્ટે. વિસ્તારમાં કેટલાક પાનના ગલ્લાઓ અને ચાની કીટલી તથા અન્ય આવા અસામાજિક તત્વોની ઉઠક બેઠકવાળી જગ્યાઓ પર આકસ્મિક સર્ચ ઓપરેશન પોલીસ દ્વારા યોજવામાં આવ્યું હતું. આ કામગીરી કરતા પહેલા પોલીસ દ્વારા સમગ્ર ઝોનમાં આવી કેટલી જગ્યાઓ છે તે બાબતે ખાનગી રીતે જગ્યાઓનો સર્વે કરવામાં આવ્યો હતો. બાદમાં પોલીસ દ્વારા આ જગ્યાઓ પર સર્ચ ઓપરેશન કરી ત્રણ કલાકમાં કુલ 361 ઇસમો વિરૂદ્ધ કાર્યવાહી કરવામાં આવી છે. આ ડ્રાઇવમાં પીઆઇ સહીતના અધિકારીઓની ટીમ બનાવવામાં આવી હતી અને ઉપરી અધિકારીઓ દ્વારા સુપરવિઝન કરવામાં આવ્યું હતું.

આ ડ્રાઇવ દરમિયાન પોલીસ દ્વારા નંબર પ્લેટ વગરના તથા ફોલ્ટી નંબર પ્લેટવાળા વાહનો વિરૂદ્ધ એમવી એક્ટ કલમ 207 મુજબ 63 કેસ, કાળા કાચવાળા વાહનો તથા ત્રિપલ સવારી પાસેથી 32,300નો દંડ, પીધેલા તથા ડ્રગ્સ લીધેલા ઇસમો વિરૂદ્ધ 12 કેસ, નશો કરીને વાહન ચલાવનાર વિરૂદ્ધ 5 કેસ, હથિયાર સાથે જી.પી.એક્ટ 135ના 22 કેસ, ટ્રાફિક અવરોધ તેમજ પૂર ઝડપે વાહન હંકારનાર વિરૂદ્ધ 28 કેસ, ઇ સિગારેટના 5 કેસ, ગેરકાયદે સ્મોકિંગ ઝોનના 3 કેસ, ગેરકાયદે ચિલમ હુક્કાના 8 કેસ, ફોઇલ પેપર-સિગારેટ પેપરના 9 કેસ આ ઉપરાંત શંકાસ્પદ વ્યક્તિઓ/ ગુનાહિત ઇતિહાસ ધરાવતા વ્યક્તિઓ વિરૂદ્ધ 34 કેસ કરવામાં આવ્યા હતા. આ ઉપરાંત તડીપાર હુકમ ભંગના 2 કેસ કરવામાં આવ્યા હતા. આમ 3 કલાકની અંદર જ પોલીસ દ્વારા 361 ઇસમો વિરૂદ્ધ કાર્યવાહી કરવામાં આવી હતી અને 32,300નો દંડ વસુલવામાં આવ્યો હતો.

ગાંધીના ગુજરાત માં દારૂ બંદી હોવા છતાં સુરત શહેરમાં સમયાંતરે દારૂના વેચાણને લઈને ચર્ચા થતી રહે છે. અલગ અલગ પોલીસ સ્ટેશન હદ વિસ્તારમાં દારૂનું વેચાણ થતું હોવાના આક્ષેપો પણ થતા રહે છે. જોકે કેટલીક જગ્યાએ ખુલ્લેઆમ દારૂ વેચાતો હોવાના વીડિયો પણ સામે આવે છે. હાલમાં જ વધુ એક વીડિયો સામે આવ્યો છે જેમાં જહાંગીરપુરામાં બે રોકટોક રીતે દારૂનું વેચાણ થતું હોવાનું સ્પષ્ટ જોઈ શકાય છે. આ બાબતે જહાંગીરપુરા પોલીસ સ્ટેશનના પીઆઇ પી.ડી. તમારે જણાવ્યું હતું કે અમારા ધ્યાન પર દારૂનું વેચાણ થતું હોવાનું આવશે તો કાયદેસરનાં પગલાં લઈશું.

હાલ એક વીડિયો સામે આવ્યો છે. જે વીડિયો જહાંગીરપુરા પોલીસ સ્ટેશનના હદ વિસ્તારનો છે. વીડિયોમાં સ્પષ્ટપણે જોઈ શકાય છે કે આ વિસ્તારમાં તાપી નદી કિનારે ઇન્ટેકવેલ પાસે દારૂનું બેફામ રીતે વેચાણ થઈ રહ્યું છે. જોકે મહત્ત્વની બાબત એ છે કે ત્યાંના સ્થાનિક લોકો પણ માને છે કે આ વિસ્તારમાં દારૂનું બેફામ રીતે વેચાણ થઈ રહ્યું છે. કેટલીક વખત અહીં દારૂ પીવા આવતા લોકો સાથે સ્થાનિક લોકોની માથાકૂટ થતી રહે છે.

ગઈકાલે તાપી નદીના જન્મદિવસની ઉજવણીનો ધાર્મિક કાર્યક્રમ યોજાયો હતો. ત્યાર બાદ સ્થાનિક લોકોના ધ્યાનમાં વાત આવી હતી કે ઈન્ટેકવેલ અને વોકવેના રસ્તો પર દારૂનું વેચાણ થઈ રહ્યું છે. દર રોજ મોડી સાંજે મોટી સંખ્યામાં લોકો અહીં દારૂ પીવા માટે પહોંચી જાય છે. આ જ સમયે કેટલાક પરિવારના લોકો પણ તાપી નદીના કિનારે ચાલવા નીકળતા હોય છે. પોતાના વિસ્તારમાં બેફામ રીતે થતા દારૂના વેચાણ અંગે પણ સ્થાનિક પોલીસને જાણ ન હોય એ માની શકાય નહીં. પોલીસે આ બાબતને ગંભીરતાથી લઈને પગલાં લેવા જોઈએ.

આગામી તા.૨૯/૬/૨૦૨૩ના રોજ મુસ્લિમ ધર્મના તહેવાર ‘બકરી ઈદ’ની ઉજવણી દરમિયાન સુરત શહેરમાં કાયદો અને વ્યવસ્થા જળવાઈ રહે એ ઉદ્દેશથી પોલિસ કમિશનરશ્રી અજયકુમાર તોમરે કેટલાક પ્રતિબંધો મૂક્યા છે. જે અનુસાર કોઈપણ વ્યક્તિએ કોઈપણ પશુની જાહેર કે ખાનગી જગ્યામાં, શેરીઓમાં કે મહોલ્લામાં વગેરે જગ્યાએ જાહેર જનતાને દેખાય તે રીતે કતલ કરવી નહિં તેમજ કોઈપણ પ્રાણીને શણગારીને એકલા કે સરઘસમાં જાહેરમાં લઈ જવા કે ફેરવવા પર તેમજ તહેવારની ઉજવણી બાદ કુરબાની પછી જાનવરના માંસ, હાડકા કે અવશેષો જાહેરમાં ફેંકવા પર પ્રતિબંધો મૂકવામાં આવે છે. આ હુકમ તા.૨૫/૬/૨૦૨૩થી તા.૩/૭/૨૦૨૩ સુધી અમલી રહેશે. હુકમનો ભંગ કરનાર શિક્ષાને પાત્ર થશે.

સુરત શહેરના ભેસ્તાનમાં પરિવાર સાથે અણબનાવ થયો હોવાથી ઘરેથી નીકળી ગયેલી ભેસ્તાનની યુવતીની વ્હારે આવી ૧૮૧ અભયમ મહિલા હેલ્પલાઈને પરિવાર સાથે સુખદ સમાધાન કરાવ્યું હતું. વિગત મુજબ મદદ કરવાની ભાવનાથી એક જાગૃત્ત વ્યક્તિએ ૧૮૧ અભયમ પર કોલ કરી જણાવ્યું કે સુરતના વડોદમાં એક યુવતી ગુમસુમ બેઠી છે અને કોઈ તકલીફમાં હોય એવું જણાય છે, જેથી મદદ કરવા વિનંતી કરી હતી. જેથી કતારગામ અભયમ ટીમ સ્થળ પર પહોંચી યુવતી સાથે વાત કરતા જાણવા મળ્યું કે, ભેસ્તાન આવાસમાં રહેતી ૨૧ વર્ષની આ યુવતી ધો.૧૦ સુધી ભણેલી છે.

મૂળ ઉત્તરપ્રદેશના વતની અને ઘણા વર્ષોથી પરિવાર સાથે સુરતમાં રહે છે. માતાપિતા મરજી વિરુદ્ધ લગ્ન કરવા દબાણ કરતા હોવાથી ખટરાગ થયો હતો. તેના ફોઈ લગ્ન માટે જે છોકરો બતાવતા હતા તે ઉંમરમાં મોટો હોવાથી પસંદ ન હતો. તેણીએ લગ્નનો ઈન્કાર કરતા ફોઈ અપશબ્દ બોલતા હતા. જેથી વાત લાગી આવતા ઘરેથી નીકળી ગઈ હતી. અભયમ ટીમે સમજાવટથી કામ લઈને પરિવાર પાસે લઈ ગયા હતા. માતાપિતાને સમજાવ્યુ કે દીકરીને પસંદ નાં હોય તેવા વ્યક્તિ સાથે દબાણ આપીને લગ્ન કરાવવા અયોગ્ય છે. અન્ય કાયદાકીય માહિતી આપીને યુવતીની સારસંભાળ રાખવા કહ્યું હતું. માતાપિતા સહમત થયા હતા અને કોઈપણ પ્રકારના દબાણ ન કરતા તેને વિશ્વાસમાં લઈને તેની મરજી જાણીને સગાઈ તેમજ લગ્ન કરવાની ખાતરી આપી હતી. દીકરી સહી-સલામત મળવાથી પરિવારે ૧૮૧ અભયમ ટીમનો આભાર વ્યક્ત કર્યો હતો.

સુરત શહેરના ખટોદરામાં બાઈક પર બે મોબાઈલ સ્નેચર આવીને હાથમાંથી મોબાઈલ ઝૂંટવીને ફરાર થઈ રહ્યા હતા. આ દરમિયાન એક સ્નેચર ગાડી પરથી પડતાની સાથે જ નાસી જવામાં સફળ થયો હતો. જયારે બીજો છટકવામાં અસફળ રહેતા તેને લોકોએ ને માર માર્યો હતો. તેની ગાડી ત્યાં જ છોડી દેતા લોકોએ રોષમાં આવીને તેની બાઈક સળગાવી નાખી હતી.

આ સંપૂર્ણ ઘટના રાયકા સર્કલ પાસે સવાર ના સમય બની હતી. મોટાભાગના મોબાઈલ સ્નેચરો સવાર અને રાત ના સમય સક્રિય થાય છે. ઓવરસ્પીડ બાઈક લઈને આવે અને વ્યક્તિના હાથમાં થી મોબાઈલ લઈને ફરાર થઈ જાય છે. ઘણી વખત ઊભા ઊભા ફોન પર વાત કરતા અથવા તો ઘણી વખત ચાલુ ગાડીએ પણ ફોન પર વાત કરનારના હાથમાંથી મોબાઈલ ઝૂંટવી લેતા હોય છે. મોબાઈલ લઈને ફિલ્મી ઢબે એટલી ઝડપથી ફરાર થઈ જાય છે કે, તેઓ કોઈના હાથમાં પણ આવતા નથી.

સુરત, તાપી મૈયાના જન્મદિને સુરતની નવી સિવિલ હોસ્પિટલથી એક સાથે બે અંગદાનની વિરલ ઘટના બની છે. જેમાં મૂળ બિહારના અરવિંદ મહંતો અને જામનગરના મનોજભાઈ ચાવડા એમ બે બ્રેઈનડેડ વ્યક્તિઓના ચાર કિડની અને બે લીવરના દાનથી છ જરૂરિયાતમંદ દર્દીઓને જીવનદાન મળશે. આ સાથે તા.૨૫/૦૬/૨૦૨૩ નવી સિવિલથી અંગદાનની સેન્ચુરી પૂર્ણ થઈ છે. નવી સિવિલ દ્વારા છેલ્લા છ મહિનામાં ૩૧ અંગદાનની ઘટનામાં કુલ ૧૦૦ અંગોનું દાન થયું છે. અંગદાનની બે ઘટનાઓની વિગતો અનુસાર મૂળ બિહારના નવાડાના જિલ્લાના બિસનપુર ગામના વતની ૪૫ વર્ષીય અરવિંદ રામચંદ્ર મહંતો મહારાષ્ટ્રના દાંડીપાડા, પાલઘર પાસે આવેલી પતરા બનાવવાની કંપનીમાં હેલ્પર તરીકે કામ કરતા હતા. ગત તા.૧૩મીએ તેઓ બિમાર હતા, એ દરમિયાન બોઈસર રેલવે સ્ટેશન પાસે ચક્કર આવતા પડી ગયા હતા. જેથી સ્થાનિક હોસ્પિટલની સારવાર બાદ વધુ સારવાર માટે તા.૧૯મીએ સુરત નવી સિવિલ હોસ્પિટલમાં ખસેડવામાં આવ્યા હતા. જ્યાં તેમને તા.૨૪મીએ તેઓને બ્રેઈનડેડ જાહેર કરાય હતા.

આ ઉપરાંત, બીજી ઘટનામાં મૂળ જામનગર જિલ્લાના દિગ્વિજય ગામના વતની અને હાલ તાપી જિલ્લાના વાઘજરી ગામ, ડેરી ફળીયા ખાતે રહેતા ૩૭ વર્ષીય મનોજભાઈ ઈશ્વરભાઈ ચાવડા કડીયા કામ કરીને ગુજરાન ચલાવતા હતા. તેઓ ગત તા.૨૨મીએ રાત્રિ દરમિયાન મજૂરી કામ અર્થે કડોદ ગામ ગયા હતા. જ્યાંથી પોતાની એક્ટિવા પર ગામ પરત ફરી રહ્યા હતા, ત્યારે રાત્રે ૧૨.૦૦ વાગ્યા આસપાસ કપુરા ગામ નજીક ટ્રકે સાથે અથડાતા અકસ્માત થયો હતો, જેથી તાત્કાલિક સારવાર માટે વ્યારા રેફરલ હોસ્પિટલમાં દાખલ કરાયા બાદ વધુ સારવાર માટે તા.૨૩મીએ સુરતની નવી સિવિલમાં રિફર કરાયા હતા. સારવાર દરમિયાન તા.૨૪મીએ તેમને બ્રેઈનડેડ જાહેર કરાયા હતા. બંને પરિવારના સભ્યોને સોટોની ટીમના ડો.નિલેશ કાછડીયા, RMO ડો.કેતન નાયક, ઈકબાલ કડીવાલા તથા કાઉન્સેલર નિર્મલા કાથુડએ અંગદાનનું મહત્વ સમજાવ્યું. જેથી અન્યને નવું જીવન મળતું હોય તો આ બંને પરિવારોએ દુઃખની ઘડીમાં પણ અંગદાન માટે આગળ વધવા સમંતિ આપી હતી.

તા.૨૫/૦૬/૨૦૨૩ નાં રોજ બ્રેઈનડેડ વ્યક્તિઓના પ્રત્યેકની બે કિડની અને એક લીવર એમ કુલ ચાર કિડની અને બે લીવરનું દાન લેવામાં આવ્યું હતું. સ્વ. મનોજના કિડની અને લીવર અમદાવાદની આઈ.કે.ડી. હોસ્પિટલમાં જ્યારે સ્વ.અરવિંદના લીવર ઝાયડ્સ હોસ્પિટલ-અમદાવાદ અને કિડની આઈ.કે.ડી. હોસ્પિટલમાં લઈ જવામાં આવી હતી. આમ, છ અંગોના દાન થકી અન્ય છ દર્દીઓના જીવનમાં નવા રંગો પૂરવાનું સેવાકાર્ય થયું હતું. સિવિલ હોસ્પિટલના સિવિલ સુપ્રિન્ટેન્ડેન્ટ ડો.ગણેશ ગોવેકર, RMO ડો.કેતન નાયક, પ્લાસ્ટિક સર્જન ડો.નિલેશ કાછડિયા, ન્યુરો સર્જન ડો.કેયુર પ્રજાપતિ, ન્યુરો ફિઝિશીયન ડો. પરેશ ઝાંઝમેરા, ન્યુરો સર્જન ડો.હરિન મોદી, નર્સિંગ કાઉન્સીલના ઉપાધ્યક્ષશ્રી ઈકબાલ કડીવાલા, નર્સિંગ સ્ટાફ, સિકયુરિટી સ્ટાફે અંગદાનમાં જહેમત ઉઠાવી હતી. નવી સિવિલ હોસ્પિટલના સફળ પ્રયાસોના પરિણામે તા.૨૫/૦૬/૨૦૨૩ ના રોજ એક સાથે ૩૦મું અને ૩૧મુ અંગદાન થયું છે એમ ડો.ગોવેકરે જણાવ્યું હતું. આમ, તા.૨૫મી જૂન- સુરતની જીવાદોરી તાપી મૈયાનો અવતરણ દિવસ છ જરૂરિયાતમંદ દર્દીઓના જીવનમાં નવો ઉજાસ ફેલાવવામાં નિમિત્ત બન્યો છે

સુરત શહેરના સરથાણા વિસ્તારમાં રહેતી સગીરાને યુવકે પ્રેમજાળમાં ફસાવી બળાત્કાર કર્યાં બાદ ફોટા સોશિયલ મીડિયામાં મૂકી બદનામ કરી જાનથી મારી નાંખવાની ધમકીઓ આપી હતી. સરથાણા વિસ્તારમાં રહેતી સગીરા 8 મહિના અગાઉ ફેસબુક અને ઇન્સ્ટાગ્રામ દ્વારા બારડોલીના બાબેન ગામે ગોપાલનગરમાં રહેતા મિહિર રાજુભાઇ પાઠકના સંપર્કમાં આવી હતી.

સોશિયલ મીડિયા દ્વારા બંને વચ્ચે મિત્રતા બાદ ­પ્રેમ સંબંધ બંધાયો હતો. ત્યારબાદ ગત તા.1 જાન્યુઆરીના રોજ મિહિર સગીરાને ભગાડી ગયો હતો. તે સમયે પરિજનોએ સગીરાના સમાજમાં બદનામીના ડરથી પોલીસ ફરિયાદ નોંધાવી ન હતી. જેનો લાભ ઉઠાવી મિહિરે પણ કિશોરીને ભગાડી ગયા બાદ તેની મરજી વિરુદ્ધ બળાત્કાર ગુજાર્યો હતો. આ સમયે મિહિરે તેણીના ફેસબુક તથા ઇન્સ્ટાગ્રામ આઇડી ના પાસવર્ડ પણ મેળવી લીધા હતા.

બાદમાં બંને વચ્ચે કોઇ કારણોસર અણબનાવ થતા સગીરા તેની માતા પાસે પરત આવી ગઇ હતી અને હકીકત જણાવી હતી. સમાજમાં બદનામીના ડરના કારણે આ પરિવારે કોઈ ફરિયાદ કરી ન હતી. જેથી મિહિરે આ સમયનો પુરો ફાયદો ઉઠાવી સગીરાને વારંવાર ફોન કરી હેરાન પરેશાન કરવાની સાથે તેણીની સાથેના ફોટાઓ સગીરાના ઇન્સ્ટાગ્રામ અને ફેસબુક આઇડીમાં અપલોડ કરી તેણીને બદનામ કરતો હતો. ઍટલું જ નહીં મિહીર કિશોરીના ફેસબુકમાં લાઇવ કરી જાનથી મારી નાંખવાની ધમકી પણ આપતો હતો. જેથી આખરે કિશોરીની માતાએ સરથાણા પોલીસ મથકમાં ફરિયાદ નોંધાવતા પોલીસે મિહિર પાઠક સામે બળાત્કારનો ગુનો નોંધી આગળની કાર્યવાહી હાથ ધરી છે.

સુરત એરપોર્ટના નવા ડિરેક્ટર રૂપેશકુમાર લોહાનીએ લાલઆંખ કરી છે અને ફ્લાઇટને ટેકઓફ તેમજ લેન્ડીંગને લઇને ઓબસ્ટ્રેકલમાં જે પણ બિલ્ડિંગો નડતરરૂપ હોય તે અંગે એરોડ્રમ વિભાગ દ્વારા જરૂરી સર્વે કરાયા બાદ છેલ્લા ચાર મહિનામાં અંદાજીત 14 જેટલી બિલ્ડિંગોને નોટિસ અપાઇ હોવાની વિગતો મળી છે. સુરત એરપોર્ટનો જ્યારે વિકાસ થયો ન હતો તે સમય દરમિયાન વેસુ વિસ્તારમાં બિલ્ડરો અને સ્થાનિક તંત્રના મેળાપીપણામાં એરપોર્ટ ઓથોરિટીની પરવાનગી વગર જ ઊંચી હાઇરાઇઝ બિલ્ડિંગો તાણી દેવાઇ હતી. જેનુ નુકસાન આજે પણ સુરત એરપોર્ટ ભોગવી રહ્યું છે. હયાત 2800 મીટરના રનવેની સામે 650 મીટરનો રન-વે બાદ કરીને હાલમાં માત્ર 2250 મીટર જ રનવેનો ઉપયોગ થઇ રહ્યો છે. 2006થી લઇને 2014 સુધીના 7 વર્ષના સમયગાળા દરમિયાન એરપોર્ટ ઓથોટિરીની પણ બેદરકારીને કારણે ઓબસ્ટ્રેકલ સર્વે કરાયો જ ન હતો અને તે જ કારણોસર આ મોટી બિલ્ડિંગો બની ગઇ હતી. હાલમાં આ મુદ્દો ગુજરાત હાઇકોર્ટમાં ચાલી રહ્યો છે.