15 ઓગસ્ટ સ્વાતંત્ર્ય દિવસે સૌ કોઈ દેશભક્તિના રંગમાં રંગાયા હતા, ત્યારે સુરતની લાજપોર સેન્ટ્રલ જેલમાં પણ 77માં સ્વતંત્રતા દિવસની ભવ્ય ઉજવણી કરવામાં આવી હતી. લાજપોર જેલમાં સ્વાતંત્ર્ય પર્વની ઉજવણીના ભાગરૂપે સૌ પ્રથમ જેલના બહારના ભાગે ત્યારબાદ જેલના અંદરના ભાગે ધ્વજવંદન કરવામાં આવ્યું હતું. જ્યાં જેલના કર્મચારીઓ, કેદીઓ, બંદીવાનો અને ક્લેરીકલ સ્ટાફએ દેશની આન બાન શાન રાષ્ટ્રધ્વજને સલામી આપી સ્વાતંત્ર્ય પર્વની ઉજવણી કરી હતી.
જેલમાં બંધ જુદા જુદા ગુનાઓના ગંભીર આરોપીઓ ભલે બહાર ચોરી, લૂંટફાટ, મારામારી કે હત્યા કર્યા હશે, પરંતુ તેમનામાં પણ ભારત માતા પ્રત્યે આપાર દેશભક્તિ છે તે લાજપોર જેલમાં સ્વાતંત્ર પર્વની થયેલી ઉજવણી પરથી જાણવા મળ્યું હતું. જેલમાં બંધ બંદીવાનોએ કરેલા સ્વાતંત્ર્ય પર્વના આયોજનમાં જુદા જુદા આરોપીએ જ અવનવી સ્ટેજ કૃતિઓ રજૂ હતી. બંદિવાનોએ જેલમાં જ ચંદ્રયાન મિશન, કમાન્ડો પર્ફોમન્સ, શહીદ ભગતસિંહનો સંવાદ અને ફાંસીનો અભિનય, સર્વ ધર્મ સમભાવ તેમજ વિવિધતામાં એકતા અંગે અભિનયનું નાટક કરી રાષ્ટ્રીય કાર્યક્રમની ઉજવણી કરી હતી.
આ ઉપરાંત જેલમાં રહી સારી કામગીરી કરનાર અધિકારી-કર્મચારીઓ અને બંદીવાનોને પ્રશંસાપત્ર એનાયત કરવામાં આવ્યા હતા. આ કાર્મક્રમમાં જેલ ખાતે ફરજ બજાવતા નાયબ અધિક્ષક પી.જી.નરવાડે, નાયબ અધિક્ષક ડી.પી.ભટ્ટ, સીનીયર જેલર એમ.એન.રાઠવા, સીનીયર જેલર પી.ડી.હિહોરીયા તેમજ સટાફના અધિકારી કર્મચારીઓ અને મોટી સંખ્યામાં બંદીવાનો હાજર રહી 77માં સ્વાતંત્ર્ય દિવસની ભવ્ય ઉજવણી કરી હતી.
