સુરત, શહેરના પાંડેસરા વિસ્તારમાં રહેતા આધેડનું ઝાડા-ઊલટી બાદ મોત નીપજ્યું છે. પાંડેસરા ઉમિયાનગર ખાતે રહેતા અને મુળ ઓરિસ્સાના વતની સુદામ શત્રુઘ્ન સાવતને શનિવારે રાત્રે ઝાડા-ઊલટી થયા હતા. સવારે તબિયત વધુ લથડી હતી. જેથી તેમને બેભાન હાલતમાં સારવાર માટે સિવિલમાં ખસેડાયા હતા. જ્યાં ફરજ પરના તબીબે તેમને મૃત જાહેર કર્યા હતા. સુદામભાઈને સંતાનમાં 1 પુત્ર અને 2 પુત્રી છે.
પાલિકાના આરોગ્ય વિભાગ દ્વારા શહેરમાં હાથ ધરેલા સર્વેમાં 241 ઝાડા-ઊલટીના અને 900 તાવના કેસ મળ્યા હતા. આ સિઝનમાં ઝાડા-ઊલટી, તાવ સહિતના પાણીજન્ય મચ્છરજન્ય રોગચાળામાં મૃતાંક 15 થયો છે.
