સુરતના ભેસ્તાન બીઆરટીએસ બસ ડેપોમાં ડ્રાઇવરો દ્વારા હડતાલ પર ઉતરતા 70 જેટલી સિટી બસો બંધ થઈ ગઈ હતી. જેના લીધે જનતાની મુશ્કેલી પણ વધી છે. સુરત મહાનગરપાલિકાના સત્તાધીશો દ્વારા અકસ્માતોને નિયંત્રણમાં લાવવા માટે કેટલાક મહત્વના નિર્ણય લેવાયા છે. અકસ્માત દરમિયાન ડ્રાઇવરોની જવાબદારી પણ નક્કી કરી દેવામાં આવી છે. જેને કારણે ડ્રાઈવરો તેનો વિરોધ કરી રહ્યા છે અને તેમને યોગ્ય વળતર ચૂકવવામાં ન આવતો હોવાની પણ વાતો કરી રહ્યા છે. અકસ્માત દરમિયાન જે પણ નુકસાન થાય એની ભરપાઇ ડ્રાઈવરોએ કરવાની રહેશે આ પ્રકારની સત્તાધીશોએ ચીમકી આપવાની સાથે જ ડ્રાઇવરોની સ્થિતિ કફોડી બની ગઈ છે. ડ્રાઈવરોએ આજે સિટી બસ ન ચલાવવાનો નિર્ણય લીધો છે.

મેયર દક્ષેશ માવાણીએ જણાવ્યું હતું કે, હજી સુધી અમારા સુધી કોઈ વાત સિટી બસના ડ્રાઈવરોએ હડતાળ કરી છે તેવી વાત આવી નથી. જો તેઓ હડતાલ પર ઉતર્યા હશે અને લોકોને મુશ્કેલી થતી હશે તો તાત્કાલિક અસરથી કોન્ટ્રાક્ટરની સામે પગલાં લઈશું. જે પણ કોન્ટ્રાક્ટરના ડાઈવરો દ્વારા હડતાલ કરવામાં આવી હશે તેમની સામે તાત્કાલિક અસરથી પગલાં લઈને ઝડપથી બસો શરૂ કરવામાં આવે તે પ્રકારના નિર્ણયો લઈશું. લોકોને કોઈ પણ પ્રકારની તકલીફ ન થાય તેનો અમે ધ્યાન રાખીશું.

સુરત, ગુજરાત રાજ્ય પોલીસ આવાસ નિગમ લી. ગાંધીનગર દ્વારા રાજય અનામત પોલીસ દળ જુથ-૧૧ માટે સુરત જિલ્લાના કામરેજ તાલુકાના વાવ ખાતે રૂ.૯.૨૮ કરોડના ખર્ચે નવનિર્મિત બિનરહેણાંક મકાનોનું લોકાર્પણ શિક્ષણરાજ્યમંત્રી પ્રફુલભાઈ પાનશેરીયાએ કર્યું હતું. પોલીસ જવાનોને વધુ સુવિધાઓ મળી રહે તે માટે રૂ.૯.૨૮ કરોડના ખર્ચે બિન રહેણાંક મકાનોમાં લાઇબ્રેરી, આંગણવાડી, શોપીંગ સેન્ટર, ગાર્ડ અને ડયુટી રૂમ, બેન્ડ સ્ટોર, કોટ રૂમનું નિર્માણ કરવામાં આવ્યું છે.

આ પ્રસંગે મંત્રીશ્રીએ જણાવ્યું હતું કે, રાષ્ટ્ર, સમાજ અને સંસ્કૃતિને સમૃધ્ધ રાખવા માટે સારા વિચારો જરૂરી છે. એસ.આર.પી.એ ગુજરાતની આર્મીની ફોર્સ છે. રાષ્ટ્રના યુવાનો તેજસ્વી અને ઓજસ્વી બનીને રાષ્ટ્ર નવી ઉંચાઈઓના શિખરો સર કરે તે માટે સરકાર તમામ પ્રયાસો કરી રહી છે. ભગવત ગીતા વિશે વિદ્યાર્થીઓને જ્ઞાન મળી શકે તેવા આશયથી ધો.૬ થી ૮ના અભ્યાસમાં સિલેબસ દાખલ કરવામાં આવ્યો હોવાની વિગતો તેમણે આપી હતી. આ અવસરે હથિયારી એકમો વડોદરાના પોલીસ મહાનિરીક્ષક ડી.એચ.પરમારે કેમ્પસને નયનરમ્ય બનાવવા માટે પરિશ્રમ કરનારા પોલીસ જવાનોને અભિનંદન પાઠવતા કહ્યું કે, પોલીસ જવાનોના શારીરિક અને માનસિક વિકાસ થાય તે માટે રાજ્ય સરકારે સક્રિયતા દાખવી સુવિધાયુકત આવાસોના નિર્માણની સાથે અન્ય સુવિધાઓ પણ આપી છે. એસ.આર.પી. વાવ ખાતે આપદા મિત્રોને તાલીમ આપવામાં આવે છે તથા ત્રણ ગામોને દત્તક લઈને ગામના યુવાનોને તાલીમ આપીને પોલીસ સેવામાં જોડવાનુ કાર્ય થઈ રહ્યું હોવાીન વિગતો આપી હતી. આ પ્રસંગે સ્વાગત પ્રવચન Dysp શ્રી કે. વી. પરીખ તથા આભારવિધિ એચ.જે.આચાર્યએ આટોપી હતી. આ પ્રસંગે શિક્ષણ સમિતિના ચેરમેન ભારતીબેન રાઠોડ, તાલુકા પંચાયતના પ્રમુખ શ્રીમતી રેખાબેન, Dysp શ્રી એ. એેમ.પટેલ, અગ્રણીશ્રી બળવંતભાઈ, હર્ષદભાઈ, સુમનબેન, તેજલબેન, પુષ્યાબેન તેમજ મોટી સંખ્યામાં પોલીસ જવાનોના પરિવારજનો ઉપસ્થિત રહ્યા હતા.

સુરત, ધાર્મિક દ્રષ્ટિએ નારિયેળનો ઉપયોગ દરેક ઘરમાં થતો હોય છે. મોટાભાગના લોકો નારિયેળની કાચલીને ફેંકી દેતા હોય છે, પરંતુ આ કાછલીમાંથી વેસ્ટમાંથી બેસ્ટ પણ બનાવી શકાય છે. જેનું ઉત્તમ ઉદાહરણ પૂરૂં પાડ્યું છે સુરતના વનિતા વિશ્રામ ખાતે તા.૨૫મી સુધી આયોજિત ‘GI’ મહોત્સવ અને ODOP હસ્તકલા-૨૦૨૩’ પ્રદર્શન સહ વેચાણ મેળામાં ભાગ લઈ રહેલા શંકરભાઈ ધર્માભાઈ શ્રીમાળીએ. બનાસકાંઠાના વડગામ તાલુકાના જલોતરા ગામના વતની શંકરભાઈ નારિયેળની બિનઉપયોગી કાચલીમાંથી ગૃહ સુશોભનની અવનવી ચીજવસ્તુઓ બનાવી વેચાણ કરી રહ્યા છે. તેઓની અનોખી કલાકૃતિઓ મુલાકાતીઓ માટે આકર્ષણનું કેન્દ્ર બની છે.

ઘરને સુંદર રીતે સુશોભિત કરવા માટે નારિયેળની કાચલીમાથી વિવિધ સાજ સજાવટની વસ્તુઓ બનાવી શકાય છે. બર્ડ ફીડર, જ્વેલરી બોક્સ, મીણબત્તી સ્ટેન્ડ, છોડના કુંડાઓ, ચા-કિટલી, વાઈન ગ્લાસ, બુદ્ધા, શ્રી ગણેશજી અને દેવદેવીઓ, રમકડા, કળશ, બાઉલ, પ્રાણી પક્ષીઓની કલાકૃતિઓ, ફલાવરવાઝ, શરબત ગ્લાસ, ટી કપ જેવા શો-પીસ સહિત અનેક ચીજો શંકરભાઈ બનાવે છે. શંકરભાઈ જણાવે છે કે, સરકારે વેચાણ પ્લેટફોર્મ આપવાના ઉમદા હેતુ સાથે યોજેલા ‘GI’ મહોત્સવ અને ODOP હસ્તકલા-૨૦૨૩’ મેળામાં સ્વસહાય જૂથો દ્વારા નિર્મિત વિવિધ ચીજવસ્તુઓના વેચાણ થકી નાના ગૃહઉદ્યોગોને આધાર મળી રહ્યો છે. હું છેલ્લા ૧૦ વર્ષથી આ કલા વડે આજીવિકા મેળવું છું અને અત્યાર સુધીમાં દ્વારકા, વડોદરા, ભરૂચ, અમદાવાદ, કેવડિયા, સુરત વગેરે સ્થળોએ રાજ્ય અને કેન્દ્ર સરકાર દ્વારા યોજાતા વિવિધ ૨૦ થી વધુ મેળાઓમાં ભાગ લઈ ચૂક્યો છું. રૂ.૧૦૦ થી લઈ ૧૦૦૦ સુધીની કાચલીની ચીજવસ્તુઓ બનાવી વેચાણ કરૂં છું. તેઓ પોતાની અનોખી કલા રસ ધરાવતા યુવાનો કે અન્ય નાગરિકોને વિનામૂલ્યે શીખવવા પણ ઉત્સુક છે જેથી કલા વારસો જળવાઈ રહે અને અન્યને પણ રોજગારી મળી રહે એમ તેમણે ઉત્સાહથી જણાવ્યું હતું.

GI મહોત્સવ, ODOP હસ્તકલા પ્રદર્શન અને વેચાણ મેળાના આયોજન થકી વેચાણનું પ્લેટફોર્મ પૂરું પાડવા બદલ સરકારનો આભાર માનતા શંકરભાઈ કહે છે કે આ પ્રકારના પ્લેટફોર્મથી ગૃહ ઉદ્યોગ અને નાના સ્વસહાય જૂથોને ઘણી જ રાહત મળે છે અને નફાનું પ્રમાણ પણ વધે છે. નોંધનીય છે કે, વનિતા વિશ્રામ ખાતે તા.૨૫ સુધી આ હસ્તકલા પ્રદર્શન અને વેચાણ મેળો સવારે ૧૦.૦૦થી રાતે ૧૦.૦૦ સુધી મુલાકાતીઓ માટે ખૂલ્લો રહેશે.