સુરત,સુરતના પોશ વિસ્તારમાં 29 મેના રોજ એક જાણીતી મોડેલની મર્સિડીઝને આગ ચાંપવાનો મામલો સામે આવ્યો હતો. આ કેસમાં હવે નવા ઘટસ્ફોટ થઈ રહ્યા છે. મોડેલે આ મામલે બે પોલીસ સ્ટેશનમાં બે ફરિયાદ નોંધાવી હતી. વેસુ પોલીસ સ્ટેશનમાં મર્સિડીઝને અજાણ્યા શખસો દ્વારા આગ ચાંપવાની અને અલથાણ પોલીસ સ્ટેશનમાં મિતેશ જૈન નામના વેપારીએ ઈન્સ્ટાગ્રામ પર તેમના નામથી ફેક એકાઉન્ટ બનાવી તેના પર્સનલ ફોટો અપલોડ કરવાની ફરિયાદ કરી હતી. મર્સિડીઝને આગ ચાંપવા મામલે વેસુ પોલીસે ગણતરીના કલાકમાં બે આરોપીની ઝડપી પાડ્યો છે. બન્ને આરોપીમાંથી એક મિતેશનો મિત્ર છે.
મોડેલે મિતેશ જૈન પર ગંભીર આરોપ મૂકતાં જણાવ્યું હતું કે 2017માં અમારી દોસ્તીની શરૂઆત થઈ હતી. તે પરિણીત હોવાનું તેણે જણાવ્યું નહોતું. 2018માં તે પરિણીત હોવાની મને જાણ થઈ હતી. જેથી મેં આ સંબંધોનો અંત લાવવાનો નિર્ણય લીધો હતો. પરંતુ તે સંબંધનો અંત લાવવા માગતો નહોતો, એટલે તે હેરાન કરવા લાગ્યો, જેને કારણે મેં તેના પર 2024માં રેપની ફરિયાદ કરી હતી.
એપ્રિલમાં વેપારીની પત્નીએ પણ મોડેલ સામે ફરિયાદ કરી હતી.
ગત 22 એપ્રિલે શહેરના ટેક્સટાઇલ ઉદ્યોગ સાથે સંકળાયેલા વેપારી અને પત્નીના નામે ઈન્સ્ટાગ્રામ પર ત્રણ એકાઉન્ટ બનાવવામાં આવ્યાં હતાં.વેપારીની પત્નીએ મોડેલ પર સોશિયલ મીડિયા મારફત ચરિત્રહનન કર્યાનો ગંભીર આક્ષેપ કરી ઉમરા પોલીસ સ્ટેશનમાં તેની સામે ફરિયાદ નોંધાવી હતી. આ ફરિયાદ અનુસાર વેપારીની પત્ની તથા તેના પતિ મિતેશના ફોટો સાથે સોશિયલ મીડિયામાં બીભત્સ પોસ્ટ કરી મોડેલે ત્રણ ફેક ઇન્સ્ટાગ્રામ એકાઉન્ટ મારફત વાઇરલ કર્યા હતા.
સમગ્ર મામલે ડીસીપી વિજય સિંહ ગુર્જરે જણાવ્યું હતું કે હાલમાં વેસુ પોલીસ CCTVના આધારે તપાસ આગળ ધપાવી રહી છે. આગ ચાંપનાર યુવકની ઓળખ કરવા ટેક્નિકલ સોર્સિસ પણ કાર્યરત કરવામાં આવ્યા છે. સમગ્ર ઘટના પાછળ શંકાસ્પદ એજન્ડા કે જૂની અદાવત છે કે નહીં એ બાબતે પોલીસ તપાસમાં લાગી છે. આ જ રીતે મોડેલના જીજાની પણ કાર બે અજાણી વ્યક્તિ દ્વારા સળગાવવામાં આવી હતી.. બન્ને ઘટનાની તપાસ ચાલુ છે, સાથે મોડેલે આરોપી સામે ફરિયાદ દાખલ કરી છે કે જ્યારે તેમના સંબંધ હતા ત્યારના ફોટો ઈન્સ્ટાગ્રામ પર એકાઉન્ટ બનાવીને અપલોડ કરવામાં આવ્યા છે. ત્રણેય કેસની તપાસ કરવામાં આવી રહી છે. મોડેલે અગાઉ મિતેશ જૈન પર દુષ્કર્મની ફરિયાદ દાખલ કરી હતી, જોકે હાઇકોર્ટમાં તેના નિવેદન પર ક્વોશિંગની પ્રક્રિયા થઈ હતી.
