બે પોલીસકર્મીએ ખાખીને લજવી! એક એ મહિલા પર તો બીજાએ સગીરા પર દુષ્કર્મ આચર્યાનો આરોપ
અમરેલીમાં હેડક્વાર્ટરના પોલીસકર્મીએ મહિલાને લગ્નની લાલચ આપી હવસ સંતોષી
ગુજરાતની ખાખી પોલીસ શાંતિ, સુરક્ષા અને સેવા માટે ઓળખાય છે, પરંતુ અમરેલી જિલ્લામાં પોલીસની ખાખીને કલંકિત કરતી ચકચારભરી ઘટના સામે આવી છે. બાબરા પોલીસ સ્ટેશનમાં ફરજ બજાવતા પોલીસકર્મી રવિરાજસિંહ ચૌહાણ વિરુદ્ધ સગીરાએ અપહરણ, પોક્સો અને દુષ્કર્મની કલમ હેઠળ ગંભીર ફરિયાદ નોંધાવી છે. તો અમરેલી સિટી પોલીસ સ્ટેશનમાં એક મહિલાએ પોલીસકર્મીએ સામે ફરિયાદ નોંધાવી છે.
સગીરાએ આરોપ લગાવ્યો છે કે, છેલ્લા 4 મહિનાથી પોલીસકર્મી રવિરાજસિંહ ચૌહાણ તેના પર શારીરિક અડપલાં કરીને શારીરિક સંબંધ બાંધતો હતો. આ ગંભીર આક્ષેપોને પગલે બાબરા પોલીસ સ્ટેશનમાં તાત્કાલિક ગુન્હો નોંધવામાં આવ્યો છે અને કાયદેસરની કાર્યવાહી શરૂ કરવામાં આવી છે.
આ મામલે પોલીસે તપાસ હાથ ધરી છે. એક જ દિવસમાં બે પોલીસકર્મી સામે દુષ્કર્મનો ગુનો નોંધાતા ખળભળાટ મચી જવા પામ્યો છે.
લગ્નની લાલચ આપી અવારનવાર શારીરિક સબંધ બાંધવાનો આરોપ
માહિતી અનુસાર, અમરેલીમાં વધુ એક પોલીસકર્મી સામે દુષ્કર્મનાં ગંભીર આરોપ સાથે ફરિયાદ નોંધાઈ છે. આરોપ મુજબ, જિલ્લાનાં સાવરકુંડલા તાલુકાનાં સીમરણ ગામે રહેતી 30 વર્ષીય યુવતીને અમરેલી હેડ કવાટરમાં ફરજ બજાવતા પોલીસકર્મી મહેશ કમાભાઈ સોલંકીએ સોશિયલ મીડિયાનાં માધ્યમથી સંપર્ક કર્યો હતો. ત્યાર બાદ મિત્રતા કેળવી પ્રેમજાળમાં ફસાવી લગ્નની લાલચ આપી અવારનવાર શારીરિક સંબંધ બાંધ્યા હતા. આ મામલે અમરેલી સિટી પોલીસમાં પોલીસકર્મી મહેશ સોલંકી સામે ફરિયાદ થતાં પોલીસે ગુનો નોંધીને વધુ તપાસ હાથ ધરી છે.
બાબરામાં પોલીસકર્મી સામે 14 વર્ષીય સગીરા પર દુષ્કર્મ આચર્યાનો આરોપ
અમરેલીનાં બાબરામાં પણ પોલીસકર્મી રવિરાજસિંહ ચૌહાણ સામે 14 વર્ષની સગીરા પર દુષ્કર્મ આચર્યું હોવાનો ગંભીર આરોપ થયો છે. છેલ્લા 4 માસથી પોલીસકર્મી સગીરાને અડપલાં કરતો, તેણીની માતાને પણ હેરાન કરતો હોવાનાં આક્ષેપ સાથે બાબરા પોલીસ મથકમાં (Babra Police Station) સગીરાનાં પિતાએ ફરિયાદ કરી હતી. પોલીસકર્મી વિરુદ્ધ અપહરણ, પોક્સો, દુષ્કર્મનો ગુનો નોંધ્યો છે. બાબરા પોલીસે ખાખીને કલંકિત કરનારા ફરાર પોલીસકર્મી રવિરાજસિંહ ચૌહાણની શોધખોળ આદરી છે.
