મૂળમાલિક આરોપી સંતોષના ગામના છે, સંતોષને ખબર હતી કે તેનો 3 વર્ષથી કોઈ અત્તોપત્તો નથી.
સચિનના સાઈદર્શન રો-હાઉસના ચારેય ફ્લેટ એક જ માલિકના છે.
સર્ચ રિપોર્ટથી ચાર ફ્લેટની ડિટેઈલ કઢાવી, જેના આધારે દસ્તાવેજ લેખ તૈયાર કરાયો.
વિકાસ મિશ્રા સાથે 44.30 લાખમાં સોદો કરી નાખ્યો હતો. પ્રદીપ શાહુના ખાતામાં 2.30 લાખ અને 40 હજારની રકમ સંતોષને આપી હતી. 2 લાખની રકમ વકીલને સ્ટેમ્પ પેપર માટે આપી હતી. તેઓ બે સાક્ષી પણ લાવ્યા હતા, જેમાં એક સાક્ષીનું નામ માનીકચંદ કલાક અને બીજાનું નામ પ્રમોદ પાંડે છે. જીશાન સુધીર નામ ધારણ કરીને મિલકત વેચાણ દસ્તાવેજ કરવા માટે આવ્યો હતો.
બહુમાળી સબ રજિસ્ટ્રાર કચેરીમાં 44 લાખના 4 ફલેટોના વેચાણ દસ્તાવેજ કરવા આવેલા બે સાક્ષીઓને સ્ટાફે બોલાવી મિલકત વેચનારને ઓળખો છો કે કેમ તે બાબતે પૂછતાં બંને ખરીદનારને ઓળખી છીએ, વેચનારને ઓળખતા નથી. એવું કહેતા સ્ટાફને શંકા ગઈ હતી. તેમણે તરત જ મિલકત વેચનારની પૂછપરછ કરી હતી, જેમાં તેના ફોનમાં આધારકાર્ડ જોતાં બોગસ દસ્તાવેજ બનાવવાનો ખેલ ઉઘાડો પડી ગયો હતો. સબ રજિસ્ટ્રારના સ્ટાફના કર્મચારી અંજનાબેન મુંગલસરાએ અઠવાલાઇન્સ પોલીસમાં ફરિયાદ આપી છે, જેના આધારે પોલીસે જીશાન મોહંમદ રફીકખાન (રહે, સાઇનાથ એપાર્ટ, સચિન), સંતોષ દામોદર પાણીગ્રાહી (રહે, ઓમસાઇ પાર્ક, સચિન) અને પ્રદીપ કાશીનાથ શાહુ (રહે, નૂપૂર હોસ્પિટલ, નાનપુરા) સામે ઠગાઈનો ગુનો નોંધ્યો છે. સંતોષના ગામના સુધીર લિંગરાજ ગૌંડાએ સચિન ખાતે સાઇપાર્ક બિલ્ડિંગમાં 4 ફલેટ ખરીદી કર્યા હતા, પરંતુ તેમનો છેલ્લાં ઘણાં વર્ષોથી કોઈ પત્તો નથી.
સબરજિસ્ટ્રારે દસ્તાવેજમાં મિલકત વેચનાર અને ખરીદનારના આધારકાર્ડ અને પાનકાર્ડની ઝેરોક્સ તેમજ ફ્લેટના ફોટા અને સાક્ષી બનેલાના આધારકાર્ડ ચકાસી ચારેય ડ્રાફ્ટ દસ્તાવેજમાં લાગેલાં ઇ-ચલણ પર સિક્કા મારી સહી કરી હતી અને એન્ટ્રી કરવા ઓપરેટર ઉર્વી શાહને દસ્તાવેજ આપ્યા હતા. ત્યાર બાદ સાક્ષીઓના ફોટોગ્રાફ લીધા હતા અને સાક્ષીઓને રૂબરૂ બોલાવી ‘મિલકત વેચનારને ઓળખો છો?” પૂછતા બંને સાક્ષી માણીકચંદ કલાક અને પ્રમોદ પાંડેએ કહ્યું કે, અમે ફ્લેટ ખરીદનારના સાક્ષી છીએ એટલે વેચનારને ઓળખતા નથી. ત્યાર પછી ડ્રાફ્ટ દસ્તાવેજમાં રજૂ કરેલો વેચનારનો આધારકાર્ડ જોતાં અને દસ્તાવેજ માટે ડમી વેચનાર બનીને આવેલા વ્યક્તિનો ચહેરો જોતાં બંને અલગ દેખાતાં શંકા ગઈ હતી એટલે પૂછ્યું તો વેચનારે પોતાનું નામ અસલ માલિક સુધીર ગૌડા હોવાનું જણાવ્યું હતું. પછી જન્મ તારીખ પૂછતાં યાદ નહીં હોવાનું કહ્યું હતું. જેથી શંકા જતાં સિનિયર અધિકારીને બોલાવી મિલકત વેચવા આવનારની વધુ પૂછપરછ કરી તેનો ઓરિજિનલ આધારકાર્ડ માંગ્યો હતો, જે મોબાઈલમાં બતાવતાં તેમાં જીશાન મોહંમદ રફીખ ખાન લખેલું હતું. આ જોતાં સમગ્ર રેકેટનો ભાંડો ફૂટ્યો હતો. આ સમયે ઓફિસની બહાર ઉભેલા સંતોષ પાણીગ્રાહી અને પ્રદીપ શાહુને પણ અંદર બોલાવી પૂછપરછ કરતાં તેમણે કબૂલ્યું હતું કે ચારેય ફ્લેટના અસલ માલિક સુધીર ગૌડા છે.
