ધી સર્ધન ગુજરાત ચેમ્બર ઓફ કોમર્સ એન્ડ ઇન્ડસ્ટ્રી, સુરતના નવનિયુક્ત પ્રમુખ અને એમની ટીમના પદગ્રહણ સમારંભમાં ગુજરાતના ઉધોગ રાજયમંત્રી અને ગૃહ રાજયમંત્રીશ્રી હર્ષ સંઘવી ઉપસ્થિત રહ્યા હતાં. પોતાના સંબોધનમાં મંત્રીશ્રીએ નવનિયુક્ત ટીમને શુભકામના પાઠવી હતી અને પોતાના વિચારો વ્યકત કર્યા હતાં. મંત્રીશ્રીએ કહ્યું હતું કે ” રાજય સરકાર આગળ ચેંબરના કન્વેનશન સેન્ટરના વિસ્તરણ માટે ઘણી રજૂઆતો કરવામાં આવતી હતી. જેથી વધારે માત્રામાં મોટી કક્ષાના એક્ઝીબીશનો આયોજીત કરી શકાય. રાજય સરકારે એના પર ગહનતાથી વિચાર કરીને સુરતના ડાયમંડ અને ટૅક્ષટાઈલ ઉધોગને પ્રગતિના પંથે ઝડપ મળૅ તે માટે કન્વેંશન સેંટરના વિસ્તરણ માટે રાજય સરકાર વતી ૨૩૪૫ લાખ રુપિયા મંજૂર કર્યા છે.સાથે મંત્રીશ્રીએ ઉમેર્યુ હતું કે, ” આ વિસ્તરણને પગલે શહેરને વધુમાં વધુ લાભ થશે. આ વિસ્તરણને પગલે મુંબઈ, બેંગ્લુરુમાં જેવા એક્ઝીબીશન થાય છે તેવા સુરત ખાતે પણ આયોજીત થશે.”
ચેમ્બરના વર્તમાન પ્રેસિડેંટ હિમાંશુ બોડાવાલાના એક વર્ષના કાર્યકાળને બિરદાવતા માનનીય મંત્રીશ્રીએ કહ્યું હતું કે , વીતેલા એક વર્ષમાં ચેંબરની ઔધોગિક ઉન્નતિ માટૅના નીત નવીન એક્ઝીબીશનો, કાર્યક્રમો થકી એમણે ચેંબરને એ જ દિશામાં આગળ ધપાવી છે જે એક ઔધોગિક સંસ્થાના સંગઠનોએ કરવું જોઈએ. ચેમ્બરના પ્રેસિડેંટ તરીકે પદગ્રહણ કરનારા શ્રી રમેશભાઈ વઘાસિયાએ નવી શરુઆત કરવાની છે. ” મંત્રીશ્રીએ સાથે પોતાનું નિરીક્ષણ રજૂ કરતાં કહ્યું કે, ” મંચસ્થ મહાનુભાવોના નામો સાથે વાહવાહી કરવાને બદલે સહુનું સ્વાગત એક સાથે કરીને તેમણે બિઝનેસમેન લોકોનો સમય બચાવી ચેમ્બરની ગરિમાને છાજે એવું કાર્ય કર્યુ છે. “
મંત્રીશ્રીએ ઉમેર્યુ હતું કે, ” ચેંબર ઓફ કોમર્સ સુરતની એવી સંસ્થા છે. કે જે સુરતના તમામ ઉધોગોનો ને દિશા અને દોરવણી આપવાનું કાર્ય કરે છે. બધા જ ઉધોગોના પ્રશ્નો વાચા આપવા માટે પ્રતિનિધિત્વ પૂરું પાડે છે. પીએમ મિત્ર પાર્કને લઈને વડાપ્રધાનશ્રી નરેંદ્ર મોદીજી, કેંદ્રિય મંત્રીશ્રીમતી દર્શનાબેન જરદોશનો આભાર વ્યકત કરું છું. આવતી 13 તારીખે એના MoU થવા જઈ રહ્યું છે ત્યારે રાજયના ઉધોગમંત્રી તરીકે આનંદની લાગણી અનુભવું છું. તમને જણાવતાં ગર્વ થાય છે કે ઉભરાટ પરથી સાકારિત થનાર બ્રીજને કારણે કન્વેંશન સેન્ટરથી પીએમ મિત્ર પાર્ક માત્ર ૨૦ મિનિટમાં જ પંહોચી શકાશે. રાજય સરકાર વતી ખાતરી આપું છું કે ઝડપથી સાકારિત થશે આ પીએમ મિત્ર પાર્ક અને વિકાસની નવી સિધ્ધિઓ આ પાર્ક સ્થાપિત કરશે. “
