વડાપ્રધાન નરેન્દ્ર મોદીએ દેશની મહિલાઓની વિકાસ માટે તથા નારીઓ આત્મનિર્ભર બને તે હેતુથી બચત જુથ યોજનાનું આયોજન કરતા સુરત તાપી જિલ્લામાં 6000 જેટલી બચત જૂથ યોજના બનાવી એક લાખ જેટલી મહિલાઓની દર મહિને 100 રૂપિયા જેટલી બચત કરતા એક કરોડ ની બચત થાય છે. આ કામગીરી માટે તાપી જિલ્લામાં રિસોર્સ પર્સન તરીકે નિમણૂક કરાઈ હતી. ત્યારબાદ મહિલાઓની સારી કામગીરી જોતા સુમુલ દ્વારા પરીક્ષા લેવામાં આવી હતી. જેમાંથી તાપી જિલ્લાની 22 આદિવાસી મહિલાઓને 2019 માં સુપરવાઈઝર બનાવી સુમુલમાંથી જ પગાર ચૂકવતો હતો. દરમ્યાન બચત જૂથમાં અન્ય મહિલાઓની ભરતી કરવાનો ઠરાવ કરીને ભરતી કરવામાં આવી હતી. ત્યારબાદ અગાઉ ની 22 મહિલાઓને સુપરવાઈઝર માંથી છૂટા કરીને ફરી પાછા રિસોર્સ પર્સન બનાવી દેતા આ મહિલાઓએ લડત ઉપાડી છે.

મહિલા નીતાબેન ગામીત સહિત તમામે રાજ્યના સહકાર રજીસ્ટારને ફરિયાદ કરી છે કે જૂના ચેરમેન અને નવા ચેરમેન તકરારનો ભોગ અને બન્યા છે. સુમુલ બોર્ડ દ્વારા અમોને છૂટા કરવા અંગેનો કોઈ ઠરાવ કરવામાં આવેલ નથી.સુમુલ ડેરીના પેટા કાયદા મુજબ મેનેજીંગ ડાયરેકટર અથવા ઈનચાર્જ મેનેજીંગ ડાયરેકટરને કર્મચારીને છૂટા કરવાની કોઈ સતા નથી. સુમુલ બોર્ડે માં પણ આ અંગે ઠરાવ થયો નથી. આ હુકમ ગેરકાયદે હોવાના આક્ષેપ કર્યા છે. સુમુલ દ્વારા જે તાપી જિલ્લાની 22 મહિલા આદિવાસીને સુપરવાઈઝરમાંથી ડીગ્રેડ કર્યા છે. તેમાં ભાજપના એક ધારાસભ્ય ની પત્ની પણ છે. જેઓ પણ સુપરવાઈઝરમાંથી રિસોર્સ પર્સનમાં ડીગ્રેડ કર્યા છે. જે ફરિયાદ થઈ છે.તેમાં ધારાસભ્યની પત્નીની પણ સહી છે. જોકે આ બાબતે ધારાસભ્ય પાસેથી વિગતો જાણવા મળી નથી. આ માટે મહિલાઓ સુમુલ ના રાજકારણ ને જવાબદાર ગણાવે  

પોલીસ સૂત્રો દ્વારા પ્રાપ્ત થતી વિગતો મુજબ ઉધના પોલીસને બાતમી મળી હતી કે ગૌરવ કશ્મીરીલાલ ચિટકારા દારૂ વેચવા ઉધના સંજયનગર સ્થિત VRL લોજીસ્ટીક ટ્રાન્સપોર્ટમાં મંગાવી સંગ્રહ કરે છે. પ્રાપ્ત બાતમીના આધારે ઉધના પોલીસે ગતસાંજે સંજયનગર સ્થિત VRL લોજીસ્ટીકના ગોડાઉન પહોંચી મેનેજરને પૂછતાં ગૌરવે હરિયાણાના રોહતકથી મંગાવેલું પાર્સલ સવારે આવ્યું છે અને તે હજુ લેવા આવ્યો નથી. પોલીસે મેનેજરને વિશ્વાસમાં લઈ તેની પાસે ગૌરવને ફોન કરી પાર્સલ લેવા બોલાવી ઝડપી પાડી તેણે મંગાવેલા ચાર પાર્સલ ખોલતા તેમાં અનુક્રમે મુકેલી રૂ.1.20 લાખની કિંમતની દારૂની 24 બોટલ મળી હતી. પોલીસે ગૌરવ ની પુછપરછ કરતા દારૂની બોટલ તે પિતરાઈ ભાઈ અજય સુભાષચંદ્ર ચિટકારા સાથે હરીયાણા રોહતકના બંટી જગદીશ નકડા અને મોનુ પાસે મંગાવતા હતા.

બંને ઉપર અને નીચે આખા અનુક્રમે રાખી વચ્ચેના અનુક્રમે કાપી બોટલો એવી રીતે પેક કરી મોકલતા કે કોઈને ખબર પડે નહીં. ત્યાર બાદ તેઓ પાર્સલ પરત રોહતક મોકલતા જેથી તેમાં ફરી દારૂ મોકલાય. છેલ્લા ત્રણ મહિનાથી તેઓ આ રોતે દારૂની બોટલ મંગાવી ગૌરવના ઉધના સત્યનગર બિલ્ડીંગ નં.39 રૂમ નં.452 માં સંગ્રહ કરી બાદમાં હોમ ડિલિવરી કરતા હતા.ઉધના પોલીસે આથી ગૌરવના રૂમ પર તપાસ કરતા ત્યાંથી દારૂની રૂ.2,50,200 ની કિંમતની વધુ 98 બોટલ મળી હતી. ઉધના પોલીસે આ અંગે બે અલગ અલગ ગુના નોંધી ગૌરવની ધરપકડ કર્યા બાદ તેના પિતરાઈ ભાઈ અજયની પણ ધરપકડ કરી રોહતકથી દારૂની બોટલ મોકલતા બંટી જગદીશ નકડા અને મોનુને વોન્ટેડ જાહેર કરી વધુ કાર્યવાહી હાથ ધરી હતી. વધુ તપાસ પીએસઆઈ એસ.વી.ચૌધરી કરી રહ્યા છે.

અઠવાલાઈન્સ સ્થિત સુરત જિલ્લા ન્યાયાલય પરિસરની બહાર તાજેતરમાં જાહેર રોડ પર હત્યાનો બનાવ બન્યો હતો. તદુપરાંત કોર્ટ બિલ્ડીંગના ટોયલેટ બ્લોકમાંથી ચપ્પુ મળી આવ્યું હતુ. જેની તપાસમાં કોર્ટ કેસની મુદતે આવનાર કાચા કામના કેદી પર હુમલો કરવામાં આવે તેવું ખુલવા પામ્યું હતુ. ભૂતકાળમાં પણ કોર્ટ બિલ્ડીંગની બહાર ચકચારી અમિત કપાસીયાવાલા હત્યા કેસથી માંડીને સંજય બડગુજર હત્યા કેસ બનવા પામ્યો હતો. સુરત કોર્ટ બિલ્ડીંગની બહાર તાજેતરમાં બનેલા મર્ડરની ઘટનાના પગલે કોર્ટ બિલ્ડીંગમાં અવર જવર કરતાં વકીલો,પક્ષકારો,કોર્ટ કર્મચારીઓ તથા ન્યાયમૂર્તિઓની સલામતીના મુદ્દે વધુ એકવાર ડીસ્ટ્રીક્ટ જજ તથા બાર એસો.ના હોદ્દેદારોની મીટીંગ મળી હતી.

સુરત કોર્ટમાં પક્ષકારો,વકીલો,જજો તથા કોર્ટ કર્મચારીઓની સલામતીના મુદ્દે ડીસ્ટ્રીક્ટ જજ વિમલ કે.વ્યાસ,ઉચ્ચ પોલીસ અધિકારીઓ તથા બાર એસો.પ્રમુખ પી. ટી. રાણા, મંત્રી હિમાંશુ પટેલ સહિતના હોદ્દેદારો વચ્ચે મંત્રણા હાથ ધરવામાં આવી હતી. જેમાં સુરત કોર્ટ બિલ્ડીંગમાં રોજીંદા કેસોમાં આવતા પક્ષકારો,વકીલો,કાચાકામના કેદીઓ, પોલીસ સ્ટાફ તથા કોર્ટ કર્મચારીઓની સલામતી માટે કોર્ટ બિલ્ડીંગના મુખ્ય ગેટ પર ચુસ્ત પોલીસ બંદોબસ્ત મુકવા,મેટલ ડીટેકટર મુકવાનો નિર્ણય લેવામાં આવ્યો હતો. કોર્ટ બિલ્ડીંગની મુખ્યગેટ પર પોલીસ બંદોબસ્ત ગોઠવવામાં આવ્યા બાદ મેટલ ડીટેકટર મુકવામાં આવ્યું નહોતુ. સુરત કોર્ટ બિલ્ડીંગમાં મુખ્ય ગેટ પર મેટલ ડીટેકટર મુકવા સાથે બે મહીલા પોલીસને પણ મુકવાનો નિર્ણય લેવામાં આવ્યો છે. જેના પગલે કોર્ટ બિલ્ડીંગમાં પ્રવેશનાર વકીલો,પક્ષકારો,કોર્ટ કર્મચારીઓએ પોતાના આઈકાર્ડ સાથે રાખીને તપાસમાં સહકાર આપવા અનુરોધ કરવામાં આવ્યો છે. કોર્ટ બિલ્ડીંગમાં આવતા શંકાસ્પદ પક્ષકારોની સઘન તપાસ હાથ ધરવામાં આવશે.

સુરતના વરાછા વિસ્તાર ખાતે આવેલા ઇસ્કોન મંદિર ની અંદર હાલ ગુજરાતનો સૌથી મોટો રથ તૈયાર કરવામાં આવી રહ્યો છે. રથયાત્રાના દિવસે પ્રથમવાર અત્યાધુનિક ટેકનિક અને સમય પ્રમાણે જે રીતે રથમાં બદલાવ આવવો જોઈએ તે જોવા મળશે. સામાન્ય રીતે રથયાત્રા માટે ખાસ લાકડાથી રથ તૈયાર કરવામાં આવતો હોય છે અને કારીગરો મહિના સુધી આ રથને તૈયાર કરે છે. પરંતુ સુરત વરાછા ખાતે ઇસ્કોન મંદિરમાં ખાસ ટ્રકની નીચેનો ભાગ લઈને તેની ઉપર ભગવાન જગન્નાથજી માટે રથ તૈયાર કરવામાં આવી રહ્યો છે. સંપૂર્ણ રીતે હાઇડ્રોલિક રથ છે. તેને ચલાવવા માટે ડ્રાઇવરની સીટ પણ જોવા મળશે અને સહેલાઈથી ભરચક વિસ્તારમાં બ્રેક લાગી શકે આ માટેની વ્યવસ્થા પણ આ રથમાં જોવા મળશે. આ રથ છેલ્લા આઠ મહિનાથી તૈયાર કરવામાં આવી રહ્યો છે. આ રથ અગાઉ વડોદરા ખાતે તૈયાર કરવામાં આવી રહ્યો હતો. પરંતુ તેનું સ્ટ્રક્ચર તૈયાર થઈ ગયા બાદ તેને સુરત લાવવામાં આવ્યો છે અને હાલ તેના રંગરોગાનનું કામ ચાલુ છે. આખા ગુજરાતમાં સૌથી આકર્ષણનું કેન્દ્ર ધરાવતો આ રથ છે. કારણ કે આ ઈલેક્ટ્રીક વાહનની જેમ રોડ પર થી પસાર થશે. તેમાં લાકડાની સાથે સ્ટીલ અને લોખંડનો ઉપયોગ કરવામાં આવ્યો છે. સમાન્ય રથની જેમ જ આ રથમાં પૈડાં જોવા પણ મળશે.

અષાઢી બીજના દિવસે રથયાત્રા કાઢવામાં આવશે. ગુજરાત ભરમાં આ રથ આકર્ષણનું કેન્દ્ર છે. કારણકે આ રથ ગુજરાતનો સૌથી મોટ રથ છે. જેની ઊંચાઈ 33 ફૂટ છે. લંબાઈ 27 ફૂટ પહોળાઈ 17 ફૂટ છે. હાલ જે આ રથ તૈયાર કરવામાં આવી રહ્યો છે તે ખૂબ જ આધુનિક અને સમય પ્રમાણે છે. મોટા ટ્રકના નીચેના ભાગ જે હાઇડ્રોલિક પાર્ટ હોય છે તેને લઈ તેની ઉપર આખી સિસ્ટમ અપલોડ કરવામાં આવી છે. રથ ને ચલાવવા માટે એક ડ્રાઇવિંગ સ્ટેન્ડ પણ છે. રથને ભક્તો ચલાવશે. આ માટે તમામ પ્રકારની સુવિધા રથમાં જોવા મળશે. જે રીતે ઈલેક્ટ્રીક ગાડીમાં જે સિસ્ટમ હોય છે, તે જ રીતે આ સિસ્ટમ અમે રથમાં તૈયાર કરી છે. રથયાત્રા કુલ 11 કિલોમીટરની હશે. જે સુરત વરાછા મીનીબજારથી પ્રારંભ થશે અને સરથાણા જકાતનાકા સુધી જશે.

ઉમરા પોલીસ સ્ટેશનના પોલીસ કર્મીઓ પેટ્રોલિંગમાં હતા ત્યારે બાતમીના આધારે બે મોબાઇલ સ્નેચરની ધરપકડ કરવામાં આવી હતી અને આ બે મોબાઇલ્સ સ્નેચરની ધરપકડ બાદ એક રીસીવરની પણ ભાગળ વિસ્તારમાંથી ધરપકડ કરવામાં આવી હતી. આમ કુલ ત્રણ આરોપીની ધરપકડ ઉમરા પોલીસ દ્વારા કરવામાં આવી હતી. પોલીસ દ્વારા જે આરોપીની ધરપકડ કરવામાં આવી છે તેમાં સાહિલ ઉર્ફે શાહિદ, મુફેજ મુલતાની અને સિદ્દીક કાપડિયાનો સમાવેશ થાય છે. સૌપ્રથમ પોલીસે સાહિલ અને મુફેજની ધરપકડ કરી હતી અને ત્યારબાદ બંનેની પૂછપરછ પછી રીસીવર તરીકેની ભૂમિકા ભજવનાર સિદ્દીક કાપડિયા નામના આરોપીની ધરપકડ કરવામાં આવી હતી.

પોલીસ દ્વારા સિદ્દીકના ઘરમાં રેડ કરતા ડાયરી મળી હતી. ડાયરીના આધારે 13 મોબાઈલ સ્નેચરમાંથી બેને પોલીસ દ્વારા ડિટેઇન પણ કરવામાં આવ્યા છે. આ ઉપરાંત પોલીસને સિદ્દીકના ઘરમાંથી ત્રણ લાખ 50 હજાર રૂપિયા રોકડા પણ મળી આવ્યા હતા. આમ પોલીસે 120 મોબાઇલ સાથે કુલ 22.50 લાખનો મુદ્દા માલ જપ્ત કર્યો હતો. એપલ સહિત 120 અલગ અલગ કંપનીના મોબાઈલ મળી આવ્યા હતા. આ ઉપરાંત બે વાહનની સાથે પોલીસે કેટલાક હિસાબી ચોપડા પણ જપ્ત કર્યા હતા અને આ મુદ્દા માલમાં એક ડાયરીની અંદર મોબાઈલ સ્નેચરોના ટૂંકા નામ લખવામાં આવ્યા હતા અને આ ડાયરી પણ જપ્ત કરવામાં આવી છે.​​​​​​​

આ ત્રણેય આરોપીની પૂછપરછ અને જપ્ત કરવામાં આવેલા મોબાઈલના આઈએમઇઆઇ નંબરના આધારે પોલીસે તપાસ કરતા ઉમરા, વેસુ, મહીધરપુરા, ગોડાદરા અને અડાજણ પોલીસ સ્ટેશનમાં નોંધાયેલા મોબાઇલ સ્ટેચિંગના 20 ગુનાનો ભેદ ઉકેલાયો છે. આ ઉપરાંત કડોદરા, લિંબાયત, ચોક બજાર, સલાબતપુરા, ગોડાદરા, મહીધરપુરા, વેસુ, અડાજણ, ખટોદરા, કતારગામ, પાલ, રાંદેર, જહાંગીરપુરામાં નોંધાયેલ ઈ એફઆઈઆરના 18 ગુનાનો ભેદ ઉકેલાયો છે. આમ કુલ 38 ગુનાનો ભેદ પોલીસે ઉકેલી કાઢ્યો છે.

ગુજરાત સરકાર દ્વારા વિદ્યાર્થીઓને ગુણવત્તાયુક્ત શિક્ષણ મળી રહે તે હેતુસર જ્ઞાનશક્તિ રેસીડેન્સીયલ સ્કૂલ, જ્ઞાનશક્તિ ટ્રાયબલ રેસીડેન્સીયલ સ્કૂલ, રક્ષાશક્તિ સ્કૂલ, સામાજિક ભાગીદારીથી શરૂ કરવા માટે આયોજન કર્યું છે. સ્કૂલમાં ધોરણ 6 માં પ્રવેશ મેળવવા માટે જ્ઞાનસેતુ સ્કોલરશીપ યોજના અંતર્ગત સૌ પ્રથમ વખત રાજ્ય કક્ષાએથી રાજ્ય પરીક્ષા બોર્ડ, ગાંધીનગર દ્વારા કોમન પ્રવેશ પરીક્ષા લેવામાં આવી હતી. આ પરીક્ષામાં ગુજરાત રાજ્યમાંથી 4,22,325 વિદ્યાર્થીઓએ ભાગ લીધો હતો જેની મેરિટ યાદી જાહેર કરવામાં આવી છે. 

સુરત પાલિકા સંચાલિત નગર પ્રાથમિક શિક્ષણ સમિતિની વરાછામાં ઈશ્વર પેટલીકર સ્કૂલ ( શાળા ક્રમાંક 16) આવી છે. આ સ્કૂલ માં ગરીબ અને મધ્યમ વર્ગના વિદ્યાર્થીનીઓ અભ્યાસ કરે છે. હાલમાં લેવાયેલી કોમન એન્ટ્રન્સ ટેસ્ટમાં આ સ્કુલની વિદ્યાર્થીનીઓ ઝળકી છે. આ ટેસ્ટમાં સ્કુલની 54 વિદ્યાર્થીનીઓએ પરીક્ષા આપી હતી જેમાંથી 51 વિદ્યાર્થી મેરીટમાં આવી છે. જાહેર કરાયેલા પરિણામમાં આ સ્કૂલ સુરત પાલિકાની સૌથી પહેલી સ્કુલ અને રાજ્યની ટોપ ટેન સ્કૂલમાં પાંચમો નંબર આવ્યો છે. શાળાની વિદ્યાર્થીનીઓએ પોતાનું જ્ઞાન ચકાસવા માટે પરીક્ષા આપી હતી જેમાં તેઓ સફળ થયા છે. થોડા સમય પહેલા આ કન્યા શાળામાં ગુણોત્સવ કરવામાં આવ્યો હતો જેમાં 94 ટકા સાથે રાજ્યમાં બીજા ક્રમે આવી હતી.

સુરતના સચીન વિસ્તારમાં તલંગપુર રોડ પર આવેલી શિવસાંઈ સોસાયટીમાં ઘરની બહાર રમતાં બે વર્ષના બાળકને ટેમ્પોના ડ્રાઈવરે અડફેટે લેતા બાળકનું મોત થવાની ઘટના સામે આવી છે. સચીન જીઆઈડીસી પોલીસ સ્ટેશનમાંથી મળતી માહિતી અનુસાર હાલમાં તલંગપુર રોડ પર આવેલા શિવસાંઈ સોસાયટીમાં રહેતા વિરેન્દ્ર કુશવાહ મૂળ ઉત્તરપ્રદેશના ફતેપુરના વતની છે. વિરેન્દ્ર કુશવાહ સંચા ખાતામાં કામ કરીને પત્ની અને બે સંતાનોનું ભરણ- પોષણ કરે છે. નાનો પુત્ર જસવંત જે 2 વર્ષ નું છે. ઘર બહાર બાળમિત્રો સાથે રમી રહ્યો હતો.

તે સમયે એક ટેમ્પોના ડ્રાઈવરે બેદરકારીથી ટેમ્પો ચલાવીને બે વર્ષીય જસવંતને અડફેટે લેતાં જસવંતને ગંભીર ઇજા થઈ હતી. દરમિયાન જ ટેમ્પો ચાલકે બાળકને અડફેટે લઇ ફરાર થઇ ગયો હતો. ટેમ્પો ચાલકે અડફેટે લેતા બાળકના કમરના ભાગે ગંભીર રીતે ઈજાગ્રસ્ત થતા સારવાર અર્થે ખાનગી હોસ્પિટલ લઈ જવામાં આવ્યો હતો. જ્યાંથી વધુ સારવાર માટે નવી સિવિલ હોસ્પિટલ લઈને આવતા ફરજ પરના ડોક્ટરે જોઈ તપાસી મૃત જાહેર કર્યો હતો. હાલ આ સમગ્ર મામલે સચિન જીઆઈડીસી પોલીસે ટેમ્પો ચાલક વિરુદ્ધ ગુનો નોંધી આગળની તપાસ હાથધરી છે.

સુરતના અલથાણ વિસ્તારમાં આવેલા પાર્ટી પ્લોટમાં એક 35 વર્ષીય યુવકનું કરંટ લાગતા મોત નિપજ્યું હોવાની ઘટના સામે આવી છે. મૂળ રાજસ્થાન અને હાલ અલથાણ વિસ્તારમાં 35 વર્ષીય શ્રવણ રામ પરિવાર સાથે રહેતો હતો. અલથાણમાં જ આવેલા ડીબી પાર્ટી પ્લોટમાં છેલ્લા 10 વર્ષથી આઇસક્રીમનું પાર્લર ચલાવી પરિવારનું ગુજરાન ચલાવતો હતો. દરમિયાન પાર્ટી પ્લોટના વીજળીના થાંભલાને યુવકનો હાથ લાગી જતા કરંટ લાગ્યો હતો. જેથી યુવકને સિવિલ હોસ્પિટલ ખસેડવામાં આવ્યો હતો. સિવિલ હોસ્પિટલમાં ખસેડાયા યુવકને ફરજ તબીબે મૃત જાહેર કર્યો હતો. જેથી પરિવારમાં શોકનો માહોલ છવાઇ ગયો હતો.

ઘટનાની જાણ પોલીસને કરવામાં આવતા સિવિલ હોસ્પિટલ પહોંચી પરિવારના નિવેદન લીધા હતા. જયારે શ્રવણના મોતના પગલે બે બાળકોએ પિતાની છત્રછાયા ગુમાવી દીધી છે.

પશ્ચિમ રેલ્વેના વડોદરા – સુરત રેલ્વે વિભાગના સાયન – કીમ સ્ટેશનો વચ્ચે LC નંબર 153 (km-281/28-30) પર અને સંજલી-કોસંબા સ્ટેશન વચ્ચે LC નંબર 166 પર ગર્ડર લોન્ચ કરવા માટે 14 જૂન, 2023 (બુધવાર) ના રોજ એન્જિનિયરિંગ બ્લોકને કારણે કેટલીક ટ્રેનો રદ કરવામાં આવશે, કેટલીક ટ્રેનો રૂટ પર રેગ્યુલેટેડ (લેટ) થશે.

રદ કરાયેલી ટ્રેન

ટ્રેન નંબર 09082 ભરૂચ – સુરત પેસેન્જર સ્પેશિયલ રદ રહેશે.

રૂટ પર રેગ્યુલેટેડ ટ્રેનો

ટ્રેન નંબર 12656 નવજીવન એક્સપ્રેસ સુપરફાસ્ટ 02 કલાક રેગ્યુલેટેડ (લેટ) થશે.

ટ્રેન નંબર 09075 મુંબઈ સેન્ટ્રલ – કાઠગોદામ એક્સપ્રેસ 01 કલાક 15 મિનિટ રેગ્યુલેટેડ (લેટ) થશે.

ટ્રેન નંબર 19015 દાદર – પોરબંદર એક્સપ્રેસ 45 મિનિટ રેગ્યુલેટેડ (લેટ) થશે..

ટ્રેન નંબર 12216 બાંદ્રા ટર્મિનસ – દિલ્હી સરાઈ રોહિલ્લા એક્સપ્રેસ 20 મિનિટ રેગ્યુલેટેડ (લેટ) થશે.

ટ્રેન નંબર 22949 બાંદ્રા ટર્મિનસ – દિલ્હી સરાઈ રોહિલ્લા એક્સપ્રેસ 10 મિનિટ રેગ્યુલેટેડ (લેટ) થશે.

ટ્રેન નંબર 22717 રાજકોટ-સિકંદરાબાદ એક્સપ્રેસ રાજકોટથી તેના રેગ્યુલર સમયના બદલે 2 કલાક મોડી ઉપડશે.

સુરતના અડાજણમાં નવનિર્મિત બિલ્ડિંગના પાંચમા માળેથી પટકાતા મજુરનું મોત થયું છે. જેને પગલે પરિવારમાં શોકનો માહોલ છવાઇ ગયો છે. મૂળ બિહારનો 19 વર્ષીય મોહમદ તૌફીક અડાજણમાં ગેલેક્સી સર્કલ પાસે બની રહેલી બિલ્ડિંગમાં મજૂરી કામ કરતો હતો. 5 મહિના પહેલા ભાઈ સાથે વતન બિહારથી સુરત રોજગારી અર્થે આવ્યો હતો અને નવનિર્મિત બિલ્ડિંગમાં જ રહેતો હતો.મજૂરી કામ કરી પરિવારને આર્થિક મદદ કરતો હતો. આજે બિલ્ડિંગમાં કામ કરવા માટે પાંચમા માળે ગયો હતો.

અચાનક યુવક પાંચમા માળેથી નીચે પટકાયો હતો. જેથી સાથી કામદારો એકઠા થઈ ગયા હતા. ત્યારબાદ તાત્કાલિક સિવિલ હોસ્પિટલ લઈ ગયા હતા. જોકે ફરજ પરના તબીબે મૃત જાહેર કર્યો હતો. ઘટનાની જાણ થતાં પોલીસ પણ સિવિલ હોસ્પિટલ પહોંચી હતી અને પરિવારના નિવેદન નોંધી પોસ્ટમોર્ટમ કરાવ્યું હતું. યુવકના મૃતદેહના પોસ્ટમોર્ટમ બાદ વતન બિહાર લઈ જવામાં આવશે તેવું પરિવારજનોએ જણાવ્યું હતું.