નેતા અને નાયબ મામલતદારે પતિને ખોટા કેસમાં ફસાવી દેવાની ધમકી આપ્યાની પોલીસમાં અરજી
મામલતદારનાં પતિ પર માનસિક ત્રાસ, માર અને જાનથી મારી નાખવાની ધમકી આપવાનો દાવો
નવસારી,સરકારી નોકરી કરતા એક મહિલા અધિકારી અને શાસક પક્ષના સ્થાનિક હોદ્દેદાર વચ્ચેના કથિત અનૈતિક સંબંધોને લઈને એક ગંભીર પારિવારિક વિવાદ સામે આવ્યો છે, જેના પગલે પોલીસ કાર્યવાહીની માંગણી કરી છે. નવસારીના ઈટાળવા વિસ્તારમાં રહેતા ૬૭ વર્ષીય વજીયાબેન રવજીભાઈ પટેલે તેમની નાયબ મામલતદાર પુત્રવધૂ તેમજ ભાજપના હોદ્દેદાર વિરુદ્ધ માનસિક ત્રાસ આપવા અને ખોટા કેસમાં ફસાવી દેવાની ધમકી આપવા બદલ પોલીસમાં અરજી આપી છે.
અરજીમાં ગંભીર આરોપ મૂકવામાં આવ્યો છે કે પુત્ર કિરણ પટેલે નાયબ મામલતદાર પુત્રવધૂ અને તેના પ્રેમી ભાજપના હોદ્દેદારને એકાંતમાં મળતા રંગેહાથ પકડી પાડયા હતા. આ સમયે પુત્રવધુએ પતિ કિરણને જીવતો ન રહેવા દેવાની અને પરિવારના તમામ સભ્યોને મારી નાખવાની ધમકી આપી હતી. એટલું જ નહીં, પોતે આત્મહત્યા કરીને સમગ્ર પરિવારને ખોટા કેસમાં ફસાવી દેવાની પણ ધમકી આપી હોવાનો ઉલ્લેખ અરજીમાં છે. ઘટના ગુરુવાર, તા. ૨૬/૧૧/૨૦૨૯ ના રોજ સાંજના સમયે આરટીઓ ઉન હાઈવે પાસે બની.
જ્યાં પુત્ર કિરણ દ્વારા પત્ની અને પ્રેમી ભાજપના નેતાને વધુ એક વખત ગાડીમાં પકડવામાં આવ્યા. આ સમયે ઝપાઝપી થઈ હતી અને તે સમયે બંને એ ભેગા મળી કિરણ પટેલને માર માર્યો હોવાનું જણાવાયું છે. વૃદ્ધ માતા વજીયાબેને સત્તાવાળાઓને વિનંતી કરી છે કે તેમના પુત્રવધૂ અને ભાજપના નેતા વિરુદ્ધ કાયદાકીય કાર્યવાહી કરવામાં આવે.
પરિવારના સભ્યોના આક્ષેપ મુજબ, પતિ પર વર્ષોથી માનસિક તણાવ અને ચિંતાનો ભાર હતો. હાલ તો નાયબ મામલતદાર અને ભાજપના નેતા સામે આ મામલે પોલીસમાં અરજી આપવામાં આવી હોવાનું જાણવા મળ્યું છે.
