સુરત મળતી માહિતી પ્રમાણે સલાબતપુરા વિસ્તારમાં આવેલા માન દરવાજા હળપતિ વાસમાં 34 વર્ષીય અઝીઝ લતીફ શેખ પરિવાર સાથે રહેતો હતો. પરિવારમાં માતા-પિતા, પત્ની અને એક વર્ષનો દીકરો છે. અજીજ પહેલા શર્ટ વેચવાનું કામ કરતો હતો. હાલ તે માર્કેટમાં પાર્સલ ઉંચકવાની કામગીરી કરીને પરિવારનું ગુજરાન ચલાવતો હતો.આપઘાત કરનાર અઝીઝના ભાઈ અનિશે જણાવ્યું હતું કે, અઝીઝના લગ્ન પહેલાં એક યુવતી સાથે અફેર હતું. 11 વર્ષ પહેલા અઝીઝ અને તે જેને પ્રેમ કરતો હતો તે યુવતીના બંનેના અલગ અલગ જગ્યાએ લગ્ન થઈ ગયા હતા. અઝીઝ અને તેની પ્રેમિકા ફરી પાંચ વર્ષ પહેલા સંપર્કમાં આવ્યા હતા અને તેમનું અફેર શરૂ થયું હતું. આ અંગે પહેલા તો અઝીઝની પત્ની જાણતી ન હતી. જો કે, થોડો સમય પહેલા તેની પત્નીને આ અંગે જાણ થઈ ગઈ હતી.
ગતરોજ અઝીઝ ઘરે હાજર હતો ત્યારે તેણે ઘરમાં રૂમમાં પંખાના હુક સાથે દુપટ્ટો બાંધીને ફાંસો ખાઈ લીધો હતો. આ અંગે પરિવારને જાણ થતાં સિવિલ હોસ્પિટલ લઈ આવ્યા હતા. જ્યાં તેને મૃત જાહેર કરવામાં આવ્યો હતો. અઝીઝના મોતના પગલે પરિવારમાં શોકનો માહોલ છવાઈ ગયો છે. ઉલ્લેખનીય છે કે, લગ્નના 10 વર્ષે પુત્રનો જન્મ થયો અને એક જ વર્ષમાં એ પુત્રએ પિતાની છત્રછાયા ગુમાવી દીધી છે. અઝીઝના મૃતદેહને પોસ્ટમોર્ટમ અર્થે સિવિલ હોસ્પિટલ ખસેડવામાં આવ્યો હતો. આ સાથે જ સલાબતપુરા પોલીસ દ્વારા પરિવારજનોના નિવેદન લેવામાં આવ્યા છે. જ્યારે પરિવારજનોના આક્ષેપોને લઈને પોલીસ દ્વારા પણ તપાસ કરવામાં આવી રહી છે. વધુ કાર્યવાહી સલામતપુરા પોલીસ દ્વારા હાથ ધરવામાં આવી છે.
