સુરતના વેડ રોડ વિસ્તારમાં રહેતા શ્રમજીવી પરિવારની ધો. 12માં અભ્યાસ કરતી 16 વર્ષની દીકરી પ્રેમીએ મરજી વિરુદ્ધ શરીરસંબંધ બાંધતાં ગર્ભવતી બની હતી. પોલીસસૂત્રો દ્વારા પ્રાપ્ત થતી વિગતો મુજબ, સુરતના વેડ રોડ વિસ્તારમાં રહેતા શ્રમજીવીનાં ત્રણ બાળકો પૈકી સૌથી નાની પુત્રી( ઉં.વ.16) ધો.12માં અભ્યાસ કરે છે. ગત સવારે પુત્રીએ મને આજે પેટમાં દુખાવો થયો છે, તેથી હું આજે સ્કૂલે જવાની નથી એમ કહ્યું હતું. બાદમાં બપોરે જમીને તે માતાને ઘરના નીચેના ભાગે સ્ટોર રૂમમાં આરામ કરવા જાઉં છું કહી નીચે ગઈ હતી. લગભગ દોઢ કલાક બાદ પુત્રીએ બૂમ પાડી માતાને બોલાવતાં તે નીચે ગયાં હતાં. જોકે પુત્રીએ મને તમે માફ કરજો, મારાથી ભૂલ થઈ ગઈ છે કહી થોડીવાર સુધી તો દરવાજો ખોલ્યો નહોતો. બાદમાં તેણે દરવાજો ખોલ્યો ત્યારે માતાએ અંદર જોયું તો લોહી ફેલાયેલું હતું અને નવજાત બાળક ખાટલામાં હતું.
મેં બાળકને જન્મ આપ્યો છે એમ કહેતાં તેની માતાએ પરિવારના અન્ય સભ્યોને જાણ કરી હતી. પરિવારે બોલાવીને પુત્રીને પૂછતાં તેણે જણાવ્યું હતું કે એક વર્ષ અગાઉ તેની મુલાકાત સોસાયટીમાં જ રહેતા રોશન દશરથભાઈ સોલંકી સાથે થઈ હતી. રોશને હું તને પ્રેમ કરું છું, આપણે બંને લગ્ન કરીશું કહી તે એક દિવસ ઘરે એકલો હતો, ત્યારે તેને બોલાવી તેની સાથે મરજી વિરુદ્ધ શરીરસંબંધ બાંધ્યો હતો. ત્યાર બાદ ત્રણ-ચાર વખત તેણે આ રીતે સંબંધ બાંધતાં ગર્ભવતી બની હતી.
આ હકીકત પરિવારથી છુપાવવામાં સફળ રહેલી પુત્રીએ ગત રોજ બાળકને જન્મ આપ્યા બાદ તેને અને બાળકને સારવાર માટે સ્મિમેર હોસ્પિટલમાં દાખલ કરાયાં હતાં. ચોકબજાર પોલીસે પુત્રીની માતાની ફરિયાદના આધારે 19 વર્ષીય રોશન વિરુદ્ધ દુષ્કર્મનો ગુનો નોંધી તેની ધરપકડ માટે તજવીજ હાથ ધરી છે.
