પાંડેસરા વિસ્તારમાં ચોથા માળેથી દોઢ વર્ષની બાળકી રમતા રમતા બારીમાંથી નીચે પટકાતા મોતને ભેટી હતી. પરિવારની એકની એક દીકરીનું મોત થતાં પરિવારમાં શોકનો માહોલ છવાઇ ગયો છે. પાંડેસરા વિસ્તારમાં આવેલા આનંદો હોમ્સ એપાર્ટમેન્ટમાં ચોથા માળે સૌમિલ દેવા પત્ની અને દોઢ વર્ષની દીકરી સાથે રહે છે. સૌમિલ મજૂરી કામ કરી પરિવારનું ગુજરાન ચલાવે છે. પુત્રી ત્રીશા આજે સવારે પોતાના ઘરમાં રમી રહી હતી. જ્યારે તેની માતા ઘરના કામમાં વ્યસ્ત હતી અને પિતા કામ પર ગયા હતા.
દરમિયાન માસુમ બાળકી રમતા રમતા બારી પાસે પહોંચી ગઈ હતી અને બારીમાંથી નીચે પટકાઈ હતી. બાળકી નીચે પટકાવવાની ઘટનાને પગલે આજુબાજુના લોકો ત્યાં દોડી આવ્યા હતા. તેમજ તેની માતાને ખબર પડતા તે પણ નીચે દોડી આવી હતી અને દીકરીને ગંભીર રીતે ઈજાગ્રસ્ત અને લોહીલુહાણ હાલતમાં સારવાર માટે નવી સિવિલ હોસ્પિટલમાં ખસેડાઇ હતી. જ્યાં ફરજ પરના તબીબોએ તેણીને મરણ જાહેર કરી હતી. ઘટના ના પગલે પોલીસે તપાસ શરૂ કરી છે.
