FBથી મિત્રતા કરીને સુરતના યુવકને દમણની હોટલમાં લૂંટી લીધો.
સોનાની ચેઇન, બ્રેસલેટ- ફોન લૂંટનારી 2 મહિલા સહિત 3 ઝબ્બે.
સોશિયલ મીડિયાના માધ્યમથી વાતચીત કરીને ધનિક લોકો સાથે મિત્રતા કરીને પાર્ટી કરવના બહાને હોટલમાં બોલાવી લૂંટ કરનારી મહિલા ગેંગને દમણ પોલીસે ઝડપી પાડી છે. નાની દમણના કડૈયા સ્થિત પોલીસ સ્ટેશનમાં થોડા દિવસ અગાઉ એક ફરિયાદ નોંધાય હતી કે, સુરતમાં રહેતો એક વેપારી યુવકને ફેસબુકના માધ્યમથી રિયા સિંગ નામક મહિલા સાથે દોસ્તી થઇ હતી. સોશિયલ મીડિયાના માધ્યમથી નિયમીત વાત થતા રિયાસિંગ અને ભોગ બનનારા યુવક વચ્ચે વિશ્વાસ વધ્યો હતો. ગત 14મી મેના રોજ રિયા સિંગ અને તેની બહેનપણી લાલી સાથે તેઓ કાર લઇને દમણ ફરવા માટે આવ્યા હતા જેમાં સુરતના યુવકને પણ બોલાવ્યો હતો. દમણના સી ફેસ તથા અન્ય વિસ્તારમાં ફરીને તેઓ એક હોટલમાં રાત્રિ રોકાણ કર્યુ હતું.
રાત્રિએ બંને મહિલાએ યુવકને દારૂ પીવડાવ્યા બાદ અર્ધ બેભાન અવસ્થામાં સુવડાવી દીધો હતો. મળસ્કે જ્યારે યુવકની ઊંધ ઊંડી તો બંને મહિલા હોટલના રૂમમાંથી ગાયબ હતી. આ ઉપરાંત યુવકની સોનાની ચેઇન, બ્રેસલેટ તથા મોબાઇલ ફોન પણ ગાયબ હતા. પોતે લૂંટાયો હોવાની ખબર પડતા યુવકે કડૈયા દમણ પોલીસ સ્ટેશનમાં બંને મહિલા વિરૂધ્ધ ફરિયાદ નોંધાવી હતી. ઉચ્ચ પોલીસ અધિકારીના માર્ગદર્શનમાં દમણની પોલીસે બંને મહિલાની ધરપકડ કરવા માટે પ્રયાસ હાથ ધર્યા હતા. સીસીટીવી ફૂટેજ અને ટેકનીકલ એનાલિસિસના આધારે બંને મહિલાની ઓળખ કરીને નજર રાખવામાં આવી રહી હતી. જોકે, બંને મહિલા લોકેશન બદલતી રહેતી હોવાથી પોલીસને પકડવામાં મુશ્કેલી આવી રહી હતી. આખરે પોલીસે બંને મહિલા આરોપી જેની ઓળખ રામલાલી સંજય શહાદે રહે. નવી સુડા વસાહત, વેસુ -સુરત અને કંચન લતા સિંહ રહે. શિવમ રેસિડેન્સી, વેદનગરી કામરેજ – સુરતની ધરપકડ કરી હતી.
